Disa persona kanë humbur jetën ose janë plagosur nga një zjarr i madh pranë bazës ushtarake Wainwright, në provincën Alberta të Kanadasë. Ministri i Mbrojtjes, David McGuinty, nuk ka konfirmuar ende shkakun e incidentit apo numrin e viktimave, duke e cilësuar situatën si shumë të rëndë dhe delikate.
Rrjeti televiziv kanadez Global News raportoi se të paktën shtatë persona kanë vdekur dhe dhjetëra të tjerë janë plagosur, pasi gjatë një stërvitjeje me municion të vërtetë u godit një tubacion gazi. Raporti u referohet burimeve ushtarake anonime, ndërsa autoritetet nuk e kanë konfirmuar zyrtarisht këtë informacion.
Kryeministri kanadez, Mark Carney, deklaroi se kishte ndodhur një incident i rëndë që kishte shkaktuar një zjarr të madh, duke shprehur mbështetjen e tij për ushtarakët dhe personat e tjerë të prekur. Ndërkohë, spitali Royal Alexandra në Edmonton aktivizoi protokollin e emergjencës për incidente me shumë viktima, pasi numri i të plagosurve rrezikonte të mbingarkonte kapacitetet e sistemit shëndetësor.
Zjarri shpërtheu të shtunën dhe u përhap me shpejtësi për shkak të erërave të forta, duke kaluar edhe përtej rrethimit të bazës, sipas autoriteteve vendore të distriktit Wainwright. Banorëve u është kërkuar të shmangin zonën dhe t’u lënë përparësi mjeteve të emergjencës.
Ministri i Mbrojtjes tha se nuk i kujtohej një incident i ngjashëm në historinë e afërt të vendit. Ndërkohë, autoritetet e provincave fqinje kanë ofruar ndihmë për përballimin e situatës.
Baza Wainwright është një nga qendrat kryesore të stërvitjes së ushtrisë kanadeze, ku zhvillohen edhe ushtrime me municion të vërtetë. Sipas transmetuesit publik CBC, në një ditë të zakonshme aty ndodhen rreth 690 ushtarakë dhe 300 punonjës civilë