Një 30-vjeçar nga Durrësi është arrestuar në Dibër, pasi policia i gjeti në taksinë që drejtonte dy armë zjarri dhe municion luftarak. Sipas dyshimeve paraprake, ai i kishte marrë armët në Tufinë të Tiranës dhe synonte t’i transportonte drejt Maqedonisë së Veriut, duke shmangur pikat zyrtare kufitare.
Kontrolli policor u krye në vendin e quajtur “Rrethrrotullimi i Bllatës”, ku shërbimet e Komisariatit të Policisë Dibër, në bashkëpunim me Seksionin Operacional të Drejtorisë Vendore të Policisë Dibër, ndaluan automjetin që drejtohej nga A. T., 30 vjeç.
Gjatë kontrollit, në sediljen e pasme të taksisë u gjet një kallashnikov me 13 fishekë, si dhe një pistoletë me një fishek në fole dhe një tjetër në krehër. Armët dhe municioni u sekuestruan si prova materiale.
Operacioni policor u kodua “Taksia”, ndërsa 30-vjeçari u arrestua në flagrancë. Nga veprimet e para hetimore dyshohet se ai kishte udhëtuar nga Tirana drejt Dibrës për të transportuar armët përtej kufirit, drejt Maqedonisë së Veriut, përmes kufirit të gjelbër.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.