Roland Gjoni ishte shpallur në kërkim pas dënimit nga Gjykata e Posaçme e Apelit për Korrupsionin dhe Krimin e Organizuar. Policia arrestoi edhe dy persona të tjerë, të dyshuar se e ndihmonin të shmangte kapjen.
Një operacion i Policisë së Shkodrës, i koduar “Last Travel”, ka çuar në arrestimin e tre personave, mes tyre një 26-vjeçar të dënuar me 6 vite e 8 muaj burgim për vepra penale në fushën e narkotikëve.
I arrestuari, Roland Gjoni, banues në fshatin Bleran të Shkodrës, ishte shpallur në kërkim pasi ishte dënuar me vendim të Gjykatës së Posaçme të Apelit për Korrupsionin dhe Krimin e Organizuar, më 14 tetor 2026. Ai është shpallur fajtor për “Prodhimi dhe shitja e narkotikëve”, “Kultivimi i bimëve narkotike”, të kryera në bashkëpunim në formën e veçantë të grupit të strukturuar kriminal, si dhe për veprën penale “Grupi i strukturuar kriminal”.
Sipas policisë, 26-vjeçari u lokalizua teksa tentonte të largohej me një automjet. Në mjet ndodheshin edhe Pashk Prendi, 30 vjeç, i cili ishte në drejtimin e automjetit, dhe Ornel Sadriam, 19 vjeç, pasagjer.
Të dy personat e tjerë, banues në Fushë-Arrëz, u arrestuan nën dyshimin se kishin ndihmuar Gjonin t’i shmangej policisë. Ata dyshohen për veprën penale “Përkrahja e autorit të krimit”.
Operacioni u organizua nga Sektori për Hetimin e Narkotikëve, në bashkëpunim me shërbimet e Komisariatit të Policisë Pukë. Materialet procedurale do t’i kalojnë Prokurorisë së Posaçme kundër Korrupsionit dhe Krimit të Organizuar (SPAK), për veprime të mëtejshme.