LIVE – Protesta në ditën e gjashtë, gurë drejt derës së PS-së, i vihet flaka Komisariatit nr. 3, sulmohen policët. Rama: Shteti nuk dorëzohet para dhunës

Kryetari i Partisë Demokratike, Sali Berisha, ka ngritur dyshime për një skenar të mundshëm për sulmin ndaj selisë blu, pas incidenteve të regjistruara gjatë protestës në Tiranë.

Në një deklaratë për mediat, Berisha akuzoi Policinë e Shtetit se ka hedhur sasi të mëdha gazi lotsjellës në oborrin e selisë së PD-së, duke pretenduar se ndërhyrja është kryer pa provokim nga protestuesit.

“Këtu në PD është një rrugë kalimi. Policia, në mënyrë kriminale, dhunoi oborrin e PD-së. Hodhën sasi të mëdha të gazit, pa pasur asnjë lloj provokimi. Sasitë e gazit kanë qenë kolosale, i kanë helmuar njerëzit”, deklaroi Berisha.

Kreu i demokratëve pretendoi se ngjarjet e mbrëmjes lidhen me një skenar për të sulmuar selinë e Partisë Demokratike, ndërsa paralajmëroi vijimin e protestave dhe mosbindjen civile.

“Ka skenar për të sulmuar selinë e PD-së”, u shpreh Berisha, duke shtuar se mbështetësit e opozitës janë të mobilizuar në Tiranë dhe në të gjithë vendin.

Ai përsëriti gjithashtu akuzat ndaj kryeministrit Edi Rama, duke deklaruar se “Edi Ramën e pret qelia e burgut”, ndërsa e cilësoi ditën e nesërme si një ditë të mosbindjes civile.

Berisha komentoi edhe praninë e të miturve në protestë, duke thënë se PD-ja do të angazhohet për mbrojtjen e tyre. Për personat e maskuar pranë selisë, ai argumentoi se përdorimi i maskave lidhej me gazin lotsjellës.

Pretendimet e Berishës për një skenar kundër selisë së PD-së nuk janë shoqëruar në deklaratën e tij me prova konkrete.

Deputeti i Partisë Demokratike, Eno Bozdo, ka akuzuar Policinë e Shtetit për përdorimin e bombolave të gazit lotsjellës pranë selisë së PD-së në Tiranë, duke e cilësuar ndërhyrjen si të paprovokuar.

Në një deklaratë nga vendngjarja, Bozdo tha se në momentin e ndërhyrjes në zonë ndodheshin dhjetëra e qindra simpatizantë dhe zyrtarë të Partisë Demokratike. Sipas tij, ai kishte parë mbi 10 automjete policie të rrethuara, ndërsa nga disa prej tyre u hodhën njëkohësisht bombola gazi, disa prej të cilave ranë pranë hyrjes së selisë blu.

Deputeti pretendoi se hedhja e gazit shkaktoi panik te personat që ndodheshin në oborrin e Partisë Demokratike, duke shtuar se ai dhe kolegë të tjerë deputetë tentuan të komunikonin me efektivët për të kuptuar arsyet e ndërhyrjes.

“Ne kemi kërkuar komandantin për t’u sqaruar, sepse nuk kuptohet për çfarë arsye pati një sulm absolutisht të paprovokuar te njerëzit që rrinin brenda oborrit të Partisë Demokratike”, u shpreh Bozdo.

Ai mohoi që në oborrin e selisë të kishte protestues, duke pretenduar se personat e pranishëm ishin vetëm anëtarë dhe simpatizantë të PD-së.

Bozdo e cilësoi situatën si të turpshme, ndërsa tha se edhe vetë ishte dëmtuar nga gazi lotsjellës. Ai përmendi gjithashtu praninë e dy ambulancave dhe personat që, sipas tij, ndodheshin në gjendje të rënduar.

“Kush i provokon? Çfarë pune? Le të vazhdojnë punën e tyre. Kjo është e turpshme”, përfundoi deputeti demokrat.

Drejtori i Përgjithshëm i Policisë së Shtetit, Skënder Hita, ka reaguar pas sulmit ndaj Komisariatit të Policisë nr. 3 në Tiranë, ku mbetën të plagosur 10 punonjës policie. Sipas tij, persona të maskuar përdorën bomba molotov, lëndë piroteknike, gurë dhe sende të forta kundër godinës dhe efektivëve që ndodheshin në shërbim.

Në deklaratën e tij, Hita theksoi se punonjësit e plagosur nuk kishin qenë të angazhuar në veprimet policore gjatë ditëve të mëparshme të protestave. Ai shtoi se sulmi krijoi rrezik edhe për personat e shoqëruar që ndodheshin brenda ambienteve të komisariatit.

“Sulmi ndaj një komisariati policie nuk është protestë”, deklaroi Hita, duke e cilësuar dhunën ndaj efektivëve si të papranueshme dhe të dënueshme me ligj.

Kreu i Policisë së Shtetit bëri të ditur se edhe gjatë ditës së sotme janë regjistruar sulme të tjera ndaj uniformave blu, me gurë, lëndë piroteknike, sfera metalike dhe bomba molotov, të cilat kanë shkaktuar plagosjen e disa punonjësve të tjerë.

Sipas Hitës, prej gjashtë ditësh efektivët e policisë po përballen me akte të përsëritura dhune, ndërsa vijojnë të garantojnë rendin dhe sigurinë publike.

Ai njoftoi se strukturat policore po punojnë për identifikimin e personave të përfshirë në sulme, dokumentimin e veprimeve të tyre dhe referimin e provave pranë organeve të drejtësisë. Hita paralajmëroi se personat për të cilët provohet përgjegjësia penale do të përballen me pasojat e parashikuara nga ligji.

Njëkohësisht, drejtori i Përgjithshëm i Policisë së Shtetit u shpreh se e drejta për protestë paqësore mbetet e garantuar, por theksoi se ajo nuk mund të përdoret për të justifikuar dhunën apo sulmet ndaj institucioneve.

Hita tha se ka udhëzuar strukturat policore të veprojnë me profesionalizëm, vetëpërmbajtje dhe vendosmëri, duke respektuar ligjin, procedurat standarde dhe parimin e proporcionalitetit.

“Vendosmëria për të ndaluar dhunën duhet të shoqërohet në çdo rast me respektimin e ligjit dhe të drejtave të qytetarëve”, u shpreh ai.

Në përfundim, kreu i Policisë së Shtetit u bëri thirrje protestuesve që ushtrojnë në mënyrë paqësore të drejtën e tyre të distancohen nga aktet e dhunshme, ndërsa siguroi se policia do të vijojë detyrën për garantimin e sigurisë publike.

“Policia e Shtetit nuk është kundërshtare e qytetarëve. Ajo është në shërbim të tyre”, përfundoi Hita.

Tensione të forta janë regjistruar pranë Kuvendit të Shqipërisë, ku janë dëgjuar shpërthime të shumta gjatë përplasjes mes protestuesve dhe forcave të Policisë.

Protestuesit kanë hedhur bomba molotov në drejtim të efektivëve, ndërsa palët janë gjendur shumë pranë njëra-tjetrës, në një situatë të tensionuar.

Në përgjigje, Policia ka përdorur sasi të mëdha gazi lotsjellës për të shpërndarë turmën. Ndërhyrja ka shoqëruar përshkallëzimin e përplasjeve në zonën pranë godinës së Kuvendit.

Situata vijon të jetë e tensionuar, ndërsa hedhja e molotovëve dhe përdorimi intensiv i gazit lotsjellës kanë shënuar një tjetër moment të fortë të protestës në kryeqytet.

Selia e Partisë Socialiste në Tiranë është bërë sërish epiqendër e përplasjeve gjatë protestës, ku një grup protestuesish kanë hedhur molotovë dhe fishekzjarrë në drejtim të godinës.

Përballë këtij sulmi, forcat e Policisë kanë ndërhyrë menjëherë, duke përdorur gaz lotsjellës për të zmbrapsur protestuesit dhe për të larguar turmën nga ambientet e selisë.

Situata është tensionuar sërish në këtë zonë të kryeqytetit, ndërsa përplasjet mes protestuesve dhe efektivëve vijojnë të shoqërojnë protestën.

Përplasjet mes protestuesve dhe forcave të Policisë janë intensifikuar në zonën pranë Ministrisë së Brendshme dhe Ministrisë së Infrastrukturës në Tiranë.

Protestuesit kanë hedhur fishekzjarrë në drejtim të efektivëve, ndërsa Policia ka ndërhyrë me gaz lotsjellës për të shpërndarë turmën dhe për të vënë situatën nën kontroll.

Tensionet në këto dy zona të kryeqytetit vijnë në një moment kur protesta është shoqëruar me përplasje të forta dhe episode të përsëritura konfrontimi mes protestuesve dhe uniformave blu.

Situata mbetet e tensionuar, ndërsa Policia vijon ndërhyrjen për të shpërndarë protestuesit.

Godina e Ministrisë së Infrastrukturës është përfshirë nga flakët pas tensioneve të regjistruara në Tiranë gjatë protestës.

Ngjarja vjen pas përplasjeve të forta mes protestuesve dhe forcave të Policisë, me hedhje molotovësh dhe përdorim të gazit lotsjellës në disa zona të kryeqytetit.

Situata mbetet e tensionuar, ndërsa ende nuk ka informacion të plotë mbi përmasat e zjarrit, dëmet e shkaktuara apo nëse ka persona të lënduar në ambientet e ministrisë.

Situata paraqitet e tensionuar pranë Ministrisë së Brendshme në Tiranë, ku protestuesit kanë hedhur molotovë në drejtim të godinës, ndërsa efektivët e vendosur në tarracë janë kundërpërgjigjur me gaz lotsjellës. Në zonë vijojnë edhe shpërthimet e kapsollave ndërsa dhe një pemë aty pranë ka marrë flakë.

Forcat speciale RENEA kanë zbarkuar në bulevardin “Dëshmorët e Kombit” në Tiranë, në një situatë të tensionuar gjatë protestës, me fokus ruajtjen e godinës së Kryeministrisë.

Prania e forcave speciale vjen në një moment kur përplasjet mes protestuesve dhe Policisë janë përshkallëzuar, me hedhje molotovësh nga protestuesit dhe përdorim të gazit lotsjellës nga efektivët.

Situata në kryeqytet vijon të jetë e rënduar, ndërsa shtimi i forcave të sigurisë në bulevard synon të mbrojë institucionin qeveritar dhe të parandalojë përshkallëzimin e mëtejshëm të situatës.

Tensione shumë të forta janë regjistruar në zonën pranë Ministrisë së Brendshme në Tiranë, ku protesta është shoqëruar me përplasje masive mes protestuesve dhe forcave të Policisë.

Protestuesit kanë hedhur bomba molotov në drejtim të efektivëve, ndërsa policia ka ndërhyrë me gaz lotsjellës për të shpërndarë turmën dhe për të vënë situatën nën kontroll.

Përplasjet kanë përshkallëzuar tensionet në këtë zonë të kryeqytetit, ndërsa përballja mes dy palëve vijon mes hedhjes së mjeteve piroteknike dhe përdorimit të gazit lotsjellës nga uniformat blu.

Ngjarjet pranë Ministrisë së Brendshme zhvillohen në një klimë të rënduar, teksa protesta në Tiranë është shoqëruar me episode të përsëritura dhune dhe përplasje me Policinë.

Situata në kryeqytet vijon të jetë e tensionuar, ndërsa disa ambiente të Komisariatit nr. 3 në Tiranë janë përfshirë nga flakët.

Raportohet se disa efektivë policie janë plagosur brenda ambienteve të komisariatit, me dëmtime në gjymtyrët e poshtme.

Ngjarja është veçanërisht shqetësuese, pasi në godinën e komisariatit ndodhen edhe ambiente paraburgimi.

Pas incidentit, në vendngjarje kanë mbërritur forca të shumta policie, si dhe një automjet zjarrfikës për ndërhyrjen dhe vënien nën kontroll të flakëve.

Deri më tani, nuk ka informacion të mëtejshëm mbi gjendjen shëndetësore të tre efektivëve të plagosur dhe përmasat e dëmeve të shkaktuara në godinë.

Kaosi në kryeqytet vijon, ndërsa u është vënë flaka disa ambienteve të Komisariatit nr. 3 në Tiranë. Situata paraqitet e rëndë, pasi në këtë komisariat ndodhen edhe ambiente paraburgimi.

Menjëherë në vendin e incidentit kanë mbërritur forca të shumta policie dhe një automjet zjarrfikës.

Komisioni Evropian ka reaguar për përshkallëzimin e protestave në Shqipëri, duke dënuar aktet e dhunës në Tiranë dhe qytete të tjera, por edhe duke theksuar se reagimi i autoriteteve duhet të jetë në përputhje me ligjin dhe proporcional.

Në deklaratën e publikuar këtë të diel, më 18 tetor, Komisioni Evropian shprehet kundër zjarrvënieve, sulmeve ndaj institucioneve shtetërore dhe shkatërrimit të pronës publike e private.

“Dhuna nuk ka vend në një shoqëri demokratike”, thuhet në deklaratë, ku nënvizohet se personat përgjegjës duhet të japin llogari përmes procedurave të rregullta ligjore.

Njëkohësisht, Brukseli rikujton se liria e tubimit dhe e shprehjes janë të drejta themelore dhe vlera thelbësore evropiane, të cilat duhet të respektohen dhe të ushtrohen në mënyrë paqësore.

Komisioni Evropian mirëpret angazhimin e autoriteteve shqiptare për të garantuar të drejtën e qytetarëve për të protestuar, duke theksuar rëndësinë e ruajtjes së këtyre lirive gjatë përballimit të situatës së krijuar.

Në mesazhin e tij, Brukseli e lidh situatën edhe me procesin e integrimit evropian të Shqipërisë, duke vënë në dukje se, në një vend kandidat që synon anëtarësimin në Bashkimin Evropian dhe që ka shënuar përparim në këtë rrugë, pakënaqësitë duhet të adresohen përmes dialogut konstruktiv dhe paqësor.

Një përplasje e fortë është regjistruar pranë sheshit “Skënderbej” gjatë protestës, ku kanë mbetur të dëmtuar një person dhe një efektiv policie.

Ende nuk dihet se kush i ka dëmtuar personin dhe efektivin. Personi shfaqet i gjakosur dhe i shtrirë në tokë, ndërsa efektivi i policisë duket se ka shenja gjaku në kokë.

Vijojnë tensionet e mëdha në protestë teksa dy autobotë të policisë po hidhnin ujë drejt protestuesve në sheshin “Skënderbej”. Aty u zhvillua një përplasje e fortë mes protestuesve dhe forcave të policisë ndërsa protestuesit arritën të zmbrapsnin autobotët e ujit dhe efektivët e policisë.

Një situatë e tensionuar është rregjistruar këtë të diel rreth orës 17:30 te Sheshi Skëndërbej ku protestuesit kanë pasur një përplasje të ashpër me policinë. Një moment protestuesit kanë hedhur molotovë në drejtim të uniformave. Një nga rrobat e policëve ka marr flakë.

Vizita zyrtare që kryeministri Edi Rama kishte planifikuar të zhvillonte të hënën, më 19 tetor, në Vjenë të Austrisë, është anuluar nga pala shqiptare.

Lajmi është publikuar nga portali austriak OTS.at, i cili shpërndan njoftime për shtyp. Sipas njoftimit, takimi i parashikuar mes kreut të qeverisë shqiptare dhe kancelarit federal të Austrisë, Christian Stocker, nuk do të zhvillohet.

Rama pritej të pritej me nderime ushtarake nga kancelari austriak, në kuadër të vizitës zyrtare në Vjenë.

Anulimi vjen në një moment tensionesh të larta në Shqipëri, ku protestat vijojnë prej gjashtë ditësh. Gjatë tubimeve janë regjistruar përplasje me Policinë, si dhe sulme me gurë e molotovë ndaj institucioneve, bankave dhe bizneseve private.

Në njoftimin e publikuar nga media austriake thuhet: “Vizita zyrtare e Kryeministrit të Republikës së Shqipërisë, Edi Rama, te Kancelari Federal Christian Stocker, e planifikuar për nesër, të hënën, më 19 tetor 2026, është anuluar nga pala shqiptare”.

Vijon kaosi në rrugët pranë qendrës së Tiranës. Pasi policia i shpërndau nga bulevardi “Dëshmorët e Kombit”, protestuesit janë zhvendosur në bulevardin “Zogu i Parë”.

Disa prej tyre kanë thyer xhamat e bizneseve private, ndërsa në të njëjtin bulevard, protestuesit kanë ndaluar edhe një ambulancë për të kontrolluar se çfarë transportonte.

Po ashtu, koshave të mbeturinave u është vënë flaka dhe janë vendosur në mes të rrugës.

Ndërkohë, kur ora shënon 16:45, protestuesit po grupohen në sheshin “Skënderbej”.

Pas ndërhyrjes së policisë për të larguar protestuesit nga bulevardi “Dëshmorët e Kombit”, një protestuese është gjetur pa ndjenja pranë Ministrisë së Brendshme.

Nga burimet bëhet e ditur se bëhet fjalë për një grua, e cila është e shtrirë në tokë. Në zonë ka mbërritur protestues të tjerë dhe një ambulancë me mjekë për t’i dhënë ndihmën e parë.

Gruaja është përmendur më pas, ndërsa dikush e ka marrë në krah për ta çuar në ambulancë.

Pasi policia i shpërndau protestuesit nga bulevardi “Dëshmorët e Kombit” me gaz lotsjellës dhe ujë, disa prej tyre u kanë vënë flakën koshave të mbeturinave në rrugën kryesore pranë Gjykatës së Lartë, ndërsa kanë bllokuar edhe trafikun.

Ata po ashtu po hedhin sende të forta në drejtim të godinës së Gjykatës së Lartë.

Në vijim të protestave që po zhvillohen në Shqipëri gjatë këtyre ditëve, janë caktuar masat e sigurisë për personat e përfshirë në çështjen e lidhur me tubimet.

Sipas masave të përcaktuara, 21 të mitur do të jenë nën mbikëqyrjen e familjarëve, ndërsa për 3 të mitur të tjerë është caktuar detyrimi për t’u paraqitur.

Për personat e tjerë janë caktuar 12 masa me detyrim paraqitjeje, një arrest në shtëpi dhe një masë që ndalon afrimin në institucionet publike, si dhe pjesëmarrjen në protesta.

Policia ka përdorur sasi të mëdha gazi lotsjellës dhe ujë për të larguar protestuesit nga sheshi pranë Kryeministrisë këtë të diel. Pas kësaj ndërhyrjeje, protestuesit janë shpërndarë pranë lumit Lana dhe parkut të Tajvanit.

Kur ora shënon 15:30, protestuesit janë mbledhur në bulevardin “Dëshmorët e Kombit”, pranë godinës së qeverisë. Disa prej tyre po qëllojnë me gurë drejt autobotëve me ujë të policisë.

Policia po u kundërpërgjigjet me gaz lotsjellës dhe ujë.

Kreu i grupit parlamentar të Partisë Socialiste, Taulant Balla, ka reaguar pas sulmit ndaj fasadës së selisë së PS-së në Tiranë, duke i kërkuar kreut të Partisë Demokratike, Sali Berisha, të largojë protestuesit e mbledhur para godinës.

Në një reagim në rrjetet sociale, Balla e ka akuzuar Berishën se qëndron pas akteve të dhunës që kanë shoqëruar protestat në kryeqytet prej gjashtë ditësh.

“O Sali, largoji urgjent njerëzit që çove tek selia e Partisë Socialiste! Janë të gjithë njerëzit e tu të paguar nga ti dhe nga Agron Shehaj, Arlind Qorrri dhe duart e huaja. Kush donte prova e kujt është protesta besoj e mor”, shkruan Balla.

Përmes këtij reagimi, socialisti ia atribuon opozitës përgjegjësinë për sulmin ndaj selisë së PS-së dhe për episodet e dhunshme të ditëve të fundit. Akuzat e Ballës vijnë në një klimë të tensionuar politike, ndërsa protesta vijon të shoqërohet me përplasje në Tiranë.

Protestuesit kanë qëlluar me gurë në drejtim të Partisë Socialiste duke thyer xhamin e derës kryesore të selisë.

Një turmë e madhe e të rinjve protestues janë afruar duke qëlluar vazhdimisht në drejtim të selisë së PS, ndërkohë që kordoni i policisë më i paktë në numër ka bërë një hap pas duke mos arritur të shmangim sulmin.

Polica ndërhyri me gaz lotsjellës dhe autobot me ujë duke bërë të mundur shpërndarjen e protestuesve të cilët janë shpërndarë në zonën rreth Bankës së Shqipërisë dhe Rrugës së Kavajës.

Pasi policia i shpërndau nga rruga e Durrësit, rreth orës 14:30, protestuesit janë vendosur në hyrje të rrugës së Dibrës.

Ndërkohë, pranë Ushtarit të Panjohur, u është vënë flaka disa kazanëve të mbeturinave, të cilët protestuesit i kanë zhvendosur në mes të rrugës.

Policia e Shtetit ka sqaruar praninë e forcave speciale RENEA para Kryeministrisë mbrëmjen e së shtunës. Drejtues Albert Nushi, shefi i Sektorit të Drejtimit në Departamentin e Sigurisë Publike, deklaroi se dislokimi i tyre erdhi pas një telefonate në sallën operative të Policisë së Tiranës, sipas së cilës, mes protestuesve kishte persona të armatosur dhe po qëllohej me armë zjarri.

Deklarta e Nushit

“Ditën e djeshme, në sallën operative të Drejtorisë Vendore të Policisë Tiranë ka ardhur një telefonatë, sipas së cilës, mes protestuesve kishte elementë të armatosur dhe po qëllohej me armë zjarri në momentin e sulmeve me lëndë piroteknike ndaj Policisë.

Përballë kësaj dhune dhe thirrjeve për vrasje, duke qenë se edhe ditën e djeshme sulmet ndaj Policisë kanë qenë të paprecedenta, Policia e Shtetit mori masa shtesë.

Për të mbrojtur jetën e punonjësve të Policisë në terren, të cilët janë të paarmatosur, në zbatim të ligjit për tubimet, në terren kanë dalë edhe strukturat speciale RENEA, pasi, bazuar në telefonatën e ardhur në sallën operative, ekzistonte rreziku për jetën e punonjësve të Policisë.

Dua të sqaroj opinionin publik se lajmet e publikuara se kanë ardhur oficerë nga policitë partnere për të menaxhuar tubimin, janë tërësisht të pavërteta”, tha ai.

Shefi i Sektorit të Menaxhimit në Departamentin e Sigurisë Publik, Albert Nushi, bëri me dije në një konferencë për mediat se 54 shtetas janë shoqëruar pas protestës së dhunshme të një dite më parë, nga të cilët 27 të arrestuar dhe 27 të proceduar penalisht për shkatërrim të pronës dhe dhunë ndaj policisë.

Ai tha se nga kontrolli i personave të maskuar është gjetur një karikator me fishekë luftarakë, bomba molotov dhe sende  të tjera të forta të përdorura ndaj efektivëve të policisë.

“Policia e Shtetit u ka bërë thirrje në mënyrë të vazhdueshme pjesëmarrësve në protesta që të distancohen nga dhuna dhe personat e maskuar, si dhe të ushtrojnë të drejtën e tyre kushtetuese për tubim në mënyrë paqësore.

Ligji për tubimet parashikon ndalimin e pjesëmarrjes në tubim me veshje ose sende të tjera, si maska, shall dhe veshje të tjera, me qëllim fshehjen e identitetit.

Në rastet kur gjatë tubimeve evidentohen persona që fshehin identitetin në kundërshtim me ligjin dhe ushtrojnë dhunë, Policia e Shtetit vepron në përputhje me kompetencat dhe procedurat ligjore përkatëse, duke ndërhyrë për shpërndarjen e tubimit kur plotësohen kushtet ligjore.

Theksojmë se grupet e maskuara dhe të dhunshme janë shpërndarë në disa rrugë të Tiranës, duke djegur pronë publike dhe private, si dhe duke shkatërruar sinjalistikën rrugore.

Njëkohësisht, i kanë vënë zjarrin hyrjes së godinës së Gjykatës së Lartë.

Pavarësisht sulmeve të pandërprera, strukturat e Policisë kanë vijuar detyrën dhe kanë shoqëruar 54 shtetas në Tiranë, nga të cilët 27 janë arrestuar dhe 27 të tjerë janë proceduar penalisht, pasi janë përfshirë në akte dhune, shkatërrim të pronës dhe sulme ndaj punonjësve të Policisë.

Gjatë veprimeve hetimore është sekuestruar një karikator me fishekë luftarakë, dy bomba Molotov dhe doza kanabisi, si dhe vida, sfera metalike dhe prova të tjera materiale, të cilat janë përdorur nga personat e maskuar dhe të dhunshëm gjatë sulmeve ndaj punonjësve të Policisë”, tha mes të tjerash drejtuesi i policisë.

Pas rreth një ore qëndrimi të protestuesve para Ministrisë së Arsimit, policia ka nisur një ndërhyrje për shpërndarjen e tyre. Me dy autobotë uji dhe forca të shumta policore, efektivët kanë nisur spostimin e protestuesve, duke përdorur edhe gaz lotsjellës.

Ndërkohë, gjatë ndërhyrjes, policia ka kryer edhe shoqërime dhe ndalime të protestuesve.

Kanë nisur përplasjet e para Ministrisë së Arsimit, ku policia ka hedhur gaz lotsjellës për të shpërndarë protestuesve të mbledhur aty në ditën e gjashtë të protestës.

Pas hedhjes së gazit lotsjellës, protestuesit janë shpërndarë më tej në drejtim të Rrugës së Durrësit.

Policia ka nisur shoqërimet e para ndërsa 2 autobote dhe dhjetëra forca policie kanë nisur të zmbrapsin protestuesit nga Ministria e Arsimit.

Kanë nisur përplasjet e para para Ministrisë së Arsimit, ku policia po hedh gaz lotsjellës ndaj protestuesve të mbledhur aty në ditën e gjashtë të protestës.

Pas hedhjes së gazit lotsjellës, protestuesit janë shpërndarë më tej në drejtim të Rrugës së Durrësit.

Ndërkohë, menjëherë pas shpërndarjes së protestuesve, policia ka nisur edhe shoqërimin e disa prej tyre.

Një incident është shënuar gjatë ditës së gjashtë të protestës, para Ministrisë së Arsimit në Tiranë, ku një vajzë është lënduar nga goditja me gur.

Ajo është ndier keq pas goditjes dhe është transportuar me ambulancë drejt spitalit për të marrë ndihmë mjekësore.

Sipas informacioneve paraprake, thuhet se vajza e lënduar është gazetare në një portal, por ky informacion mbetet ende për t’u verifikuar.

Kanë nisur përplasjet mes studentëve dhe policisë në protestën që po mbahet para Ministrisë së Arsimit.

Protestuesit kanë nisur të shkulin pllakat e trotuarit duke qëlluar me gurë në drejtim të godinës. Menjëherë ka ndërhyrë policia që ka qetësuar situatën.

Kryepeshkopi Joan, në përfundim të Liturgjisë Hyjnore të ditës së sotme, bëri thirrje që të gjithë ata që kanë përgjegjësinë e vendimmarrjes të marrin vendime të urta dhe të pjekura, në shërbim të vendit.

“Lutemi që Perëndia t’i ndriçojë të gjithë ata që kanë përgjegjësinë e vendimeve, të marrin vendime të urta dhe të pjekura në shërbim të të gjithë vendit. Sepse Shqipëria është e të gjithëve. Të gjithë ata që banojnë këtu janë pjesë e saj dhe të gjithë kanë të drejtën për të marrë pjesë në ndërtimin e saj. Prandaj, i lutemi Zotit që të ndriçojë mendjet për të marrë vendimet e duhura dhe shpresojmë që lutjet e të drejtëve Perëndia do t’i dëgjojë”, theksoi Kryepeshkopi Joan.

Raportuesi për Shqipërinë në Parlamentin Evropian, Andreas Schieder, ka shprehur shqetësimin për situatën e krijuar në Tiranë pas protestave të shoqëruara me përplasje të dhunshme mes protestuesve dhe Policisë.

Përmes një reagimi në rrjetet sociale, Schieder u ka bërë thirrje palëve të ndalin menjëherë përshkallëzimin e situatës, duke theksuar se dhuna nuk mund të jetë zgjidhje, pavarësisht se nga kush ushtrohet.

Reagimi i Andreas Schieder

Në të gjithë Europën, të rinjtë po dalin në rrugë, nga Parisi dhe Berlini deri në Tiranë. Ata po luftojnë për arsim më të mirë dhe mundësi të barabarta për të gjithë. Kjo është e drejtë dhe e nevojshme, dhe duhet t’i nxisë qeveritë të rishikojnë qasjen e tyre. Arsimi është investimi ynë më i rëndësishëm për të ardhmen dhe nuk duhet të varet kurrë nga mundësitë financiare të prindërve.

Megjithatë, dhuna nuk është kurrë zgjidhje, pavarësisht nëse vjen nga individë të dhunshëm që depërtojnë në protesta apo nga shteti dhe policia.

Si raportues i Parlamentit Europian për Shqipërinë, jam veçanërisht i shqetësuar për situatën në Tiranë dhe bëj thirrje për ndalimin e menjëhershëm të përshkallëzimit.

Në prag të protestës së gjashtë në Tiranë, disa institucione kanë marrë masa shtesë sigurie, duke blinduar dyert dhe dritaret për t’u mbrojtur nga sulme të mundshme.

Një ditë pasi protestuesit i vunë flakën, Gjykata e Lartë ka vendosur mbrojtëse metalike në dritare, me qëllim parandalimin e dëmtimeve në rast të përsëritjes së incidenteve të dhunshme.

Të njëjtat masa janë marrë edhe në Ministrinë e Arsimit, ku hyrja është blinduar me struktura hekuri për të parandaluar hedhjen e molotovëve dhe sendeve të tjera të forta në drejtim të godinës.

Ministria e Arsimit ka qenë një nga institucionet e shënjestruara gjatë ditëve të fundit të protestave, ku janë regjistruar akte dhune dhe dëmtime të pronës.

Ka nisur grumbullimi i protestuesve para Ministrisë së Arsimit, në ditën e gjashtë të protestës së studentëve, të cilëve u janë bashkuar edhe qytetarë të tjerë.

Edhe këtë të diel, të rinjtë janë mbledhur pranë institucionit, duke mbajtur në duar flamuj kombëtarë dhe duke bërë thirrje për dorëheqjen e kryeministrit Edi Rama.

Një prej pjesëmarrësve, në shenjë revolte, grisi certifikatën e marrë si fitues i Olimpiadës së Historisë.

Përpara këtij veprimi, i riu u bëri thirrje i bëri thirrje policisë të mos ushtrojë dhunë ndaj studentëve ndërsa u kërkoi edhe këtyre të fundit të mos përdorin dhunë ndaj policisë.

65 persona kanë mbetur të lënduar gjatë protestës së zhvilluar më 17 tetor 2026 në Tiranë, ndërsa 12 prej tyre vijojnë të jenë të shtruar në Spitalin e Traumës.

Sipas të dhënave të përditësuara nga Ministria e Shëndetësisë, mes të lënduarve janë 37 efektivë të Policisë, 24 protestues dhe 4 kalimtarë, mes të cilëve edhe një i mitur.

Ndërkohë, numri i përgjithshëm i personave të lënduar gjatë pesë ditëve të protestave në kryeqytet ka arritur në 272.

Nga totali, 169 janë punonjës të Policisë, 82 protestues dhe 21 kalimtarë.

Kryeministri Edi Rama deklaroi se shteti nuk do të tërhiqet përballë dhunës gjatë protestave, ndërsa u bëri thirrje qytetarëve që kërkojnë dialog të takohen me të në Kryeministri, në fakultet apo në një format tjetër komunikimi.

Gjatë një komunikimi të drejtpërdrejtë nga zyra e tij në Kryeministri, Rama iu drejtua edhe të rinjve që, sipas tij, marrin pjesë në protesta pa pasur si qëllim përdorimin e dhunës, por që përballen me persona të maskuar dhe mjete të forta në radhët e protestuesve.

“Nuk ndodh të dorëzohet shteti përpara kësaj, se nuk e merr veten me vite. Ftoj këdo që do të bëjë dialog, këdo që do të më takojë, këdo që do të flasë me kamera pa kamera me fotografi pa fotografi, në kryeministri, në fakultet, çfarë doni, çfarë mund të bëjmë për ju. Po flas për ata vajza e djem që nuk shkojnë me gur, por në pararojë kanë gurët, maskat, dhe pastaj thonë na lëndoi policia. Aty nuk bëhet balet as nuk luhet futboll. Jo po doli RENEA. RENEA del sa herë që ka rrezik, patjetër doli dhe do dali, do shtrëngohet rrethi ndaj atyre me maskë. Kush do të flasë me mua pa maskë më ka këtu, kush do të më çojmë mesazh me maskë mua dhe shtetin më ka përballë. Kjo që po ndodh, Shqipërinë do ta nxjerrë më të fortë”, tha Rama.

Kryeministri Edi Rama ka refuzuar sërish thirrjet për dorëheqjen e tij, duke argumentuar se largimi i qeverisë në këtë moment mund të ndikojë në procesin e negociatave të Shqipërisë me Bashkimin Evropian.

Gjatë një komunikimi të drejtpërdrejtë në rrjetet sociale, Rama deklaroi se në diskutim nuk është vetëm pushteti i tij, por edhe vijimi i procesit të integrimit evropian, përpara të cilës sic tha shteti nuk mund të dorëzohet pasi do të mbetet prapa me vite.

“Nuk është pushteti im këtu në lojë, është tryeza e negociatave në BE dhe shqiptarët duhet ta mendojnë shumë qartë: duan këtë apo duan BE-në? Do të thonë disa se do të ikësh ti dhe ne nuk do të shkojmë në BE. Nuk po them që po, patjetër, jeni një tufë të paaftësh për ta çuar vendin në BE, një tufë mediokrësh, ziliqarësh, që vetëm nxisni dhunë, se nuk më mundni dot me zgjedhje dhe ju ka ardhur dita te guri. E filluat me shishe uji, me vezë dhe arritët te guri, po le të themi që jeni po kaq të aftë. Negociatat janë deri në vitin 2027. Kalendari kërkon që çdo ditë të çojmë çfarë kemi bërë. Kjo ndërpritet. Nëse unë po iki dhe po lë të vijë ai neoballist apo neokomunist, do të duhet një kohë e gjatë. Nuk ndodh të dorëzohet shteti përpara kësaj, se nuk e merr veten me vite”, tha Rama.

Kryeministri Edi Rama iu përgjigj studentëve që prej ditësh protestojnë, duke deklaruar se ka dëgjuar vazhdimisht thirrjet e tyre për dorëheqje dhe burgosje, por sipas tij, nuk i është paraqitur asnjë kërkesë konkrete për arsyet pse duhet të largohet nga detyra.

Gjatë një komunikimi live në Facebook, Rama tha se studentët kanë protestuar për 140 ditë, por nuk kanë kërkuar, sipas tij, një dialog të drejtpërdrejtë për të argumentuar arsyet e largimit të tij nga posti i kryeministrit.

“Ju kam dëgjuar çdo ditë, sepse keni ardhur poshtë dritares sime. Ju kam dëgjuar ‘në burg’, ‘në litar’, ‘burg, burg, jep dorëheqjen’. S’kam dëgjuar kërkesa. Keni ardhur aty 140 ditë dhe asnjëherë s’keni trokitur te dera dhe të të themi me njerëzillëk, sy më sy, pse duhet të ikësh”, u shpreh Rama.

Kreu i qeverisë theksoi se kërkesa për dorëheqjen e tij është legjitime në një shoqëri demokratike, por sipas tij, ajo duhet të shoqërohet me argumente dhe dialog.

“Ti do që unë të iki, kjo është gjëja më normale në botë, por si do të iki unë? Të paktën hajde më bind pse duhet të iki unë ose të bind unë pse s’duhet të iki unë”, deklaroi kryeministri.

Kryeministri Edi Rama tha në një lidhje live nga zyra e tij mëngjesin e së dielës se dhuna që po ndodh prej 5 ditësh në Tiranë nuk është dorë e studentëve por dhunë e orkestruar nga opozita në Shqipëri dhe agjentura të huaja që nuk i duan të mirën Shqipërisë.

Rama tregoi se 2 ditë më parë është neutralizuar një dron që do godite me eksploziv Kryeministrisë.

“Përpara 2 ditësh është neutralizuar një dron më eksploziv që do të godiste Kryeministrinë dike i bënë flakën e oborrit të brendshëm dhe imagjinoni pasojat. S’ka rini dhe s’ka student që i shkon mendja ta bërë në jetë këtë plan,  kjo është një dorë e huaj”, tha Rama.

Kryeministri Edi Rama ka reaguar për protestën që prej pesë ditësh po zhvillohet në Tiranë, duke deklaruar se është përpjekur të shmangë përshkallëzimin e situatës dhe të mos bjerë në atë që e cilëson si “kurthi i dhunës që kërkon gjak”.

Në reagimin e tij, Rama u ndal te zhvillimet e protestës dhe bëri një paralelizëm me ngjarjet e 21 janarit, duke kujtuar viktimat dhe të plagosurit gjatë asaj dite.

“Jam përpjekur të mos përfshihem dhe të ndjek e koordinoj me shumë durim një përpjekje për të mos rënë në kurthin e ngritur të dhunës që kërkon gjak. Unë e di historinë e këtij bulevardi, e njoh mirë, i kam ende të freskëta në kujtesë ato që ndodhën në 21 janar ku pati disa zjarre sporadike tek-tuk në këtë perimetër, jo një kazan, po ku nuk u prek në asgjë, asnjë institucion, ku nuk u hodh asnjë molotov, ku nuk u dëmtua dhe nuk u dogj askush nga forcat e rendit dhe kur u vranë me plumba 4 protestues dhe u plagosën dhjetëra të tjerë, që ndryshe nga sot nuk shkuan dot as në spital se i priste përsëri druri dhe u mjekuan në shtëpi. Përtej faktit që ata që qëllojnë me gurë, zare hekuri e vida për t’i nxjerrë sytë policisë janë kriminelë, e kam parasysh që ata janë fëmijë të verbër të Shqipërisë dhe jeta e tyre vlen më shumë se çdo gjë tjetër në fund të ditës. Vetëpërmbajtja është A dhe Zh e kësaj historie”, tha Rama.

Sipas tij këto protesta të dhunshme po sfidojnë të ardhmen e Shqipërisë në Bashkimin Evropian.

Po sfidohet Shqipëria në Bashkimin Europian në vitin 2030 dhe mënyra evropiane mes forcave në një hapësirë demokratike ku liria dhe e drejta ime mbaron ku fillon jotja. Kjo është sfida, kjo është sprova. Natyrisht që unë i kuptoj shumë më mirë sesa ç’mund të mendojnë shumica dërrmuese e atyre që duan një qetësi të shtirur, të gjitha arsyet pse sot jemi në këtë terror gurësh. Jo nga populli, por nga një grusht njerëzish, edhe pse një pjesë e asaj mase e mbështet qorrazi këtë dhunë”, u shpreh Rama.

Ambasada e Shteteve të Bashkuara të Amerikës në Tiranë ka reaguar lidhur me protestat dhe situatën e krijuar ditët e fundit në Shqipëri. Ambasada bën thirrje e për zhvillimin e protestave në mënyrë paqësore dhe pa akte dhune, si dhe të gjitha palëve për vetëpërmbajtje dhe qetësi.

“Dhuna, trazirat, lëndimi fizik i të tjerëve dhe shkatërrimi i pronës nuk janë angazhim qytetar. U bëjmë thirrje të gjithë qytetarëve që zgjedhin të demonstrojnë ta ushtrojnë të drejtën e tyre për protestë në mënyrë paqësore, pa akte të dhunshme. U bëjmë thirrje të gjitha palëve për vetëpërmbajtje dhe qetësi”,- thuhet në reagimin e Ambasadës.