Presidenti amerikan Donald Trump njoftoi javën e kaluar një marrëveshje me Moskën për furnizimin e SHBA-së me naftë, me synimin për të ulur çmimet e karburanteve përpara zgjedhjeve të mesmandatit më 3 nëntor.
Zëvendëskryeministri rus për Energjinë, Alexander Novak, deklaroi se palët po negociojnë ende kushtet tregtare dhe po punojnë për finalizimin e kontratave. Ai nuk dha një datë konkrete për nënshkrimin e tyre, ndaj koha e nisjes së furnizimit mbetet e paqartë.
Rritja e çmimeve të karburanteve në SHBA që nga fillimi i luftës së përbashkët amerikano-izraelite kundër Iranit ka shtuar pakënaqësinë e qytetarëve. Kjo situatë mund të ndikojë te republikanët e Trump-it përpara zgjedhjeve të nëntorit.
Megjithatë, shumë ekspertë vlerësojnë se marrëveshja për furnizimin me naftë dizel nga Rusia nuk do të sjellë ndryshime të mëdha në shpenzimet e konsumatorëve amerikanë.
SHBA-ja konsumon rreth 3,9 milionë fuçi naftë dizel në ditë, ndërsa marrëveshja me Rusinë parashikon fillimisht një sasi totale prej 2,22 milionë fuçish. Kjo sasi mbulon më pak se gjysmën e konsumit ditor të vendit.