Policia e Shtetit ka shpjeguar se vendosi të nxjerrë në terren forcat speciale RENEA gjatë protestës së së shtunës në Tiranë, pas një telefonate në sallën operative ku raportohej se mes protestuesve kishte persona të armatosur dhe po qëllohej me armë zjarri. Megjithatë, në deklaratën e saj, Policia nuk konfirmon praninë e personave që qëllonin me armë.
Sipas Inspektorit të Sigurisë Publike, Albert Nushi, ndërhyrja u vendos për të mbrojtur efektivët e policisë, të cilët, sipas tij, po përballeshin me sulme me gurë, pllaka trotuari, sfera e vida metalike, lëndë piroteknike dhe bomba Molotov. Policia deklaron se forcat speciale u angazhuan për shkak të rrezikut të pretenduar për jetën e efektivëve.
Gjatë protestës në Tiranë u shoqëruan 54 persona, nga të cilët 27 janë arrestuar dhe 27 të tjerë janë proceduar penalisht. Sipas Nushit, nga sulmet u plagosën 37 punonjës policie. Ndërkohë, në Shkodër dhe Vlorë janë proceduar penalisht edhe 19 persona për veprime të kundërligjshme gjatë tubimeve.
Gjatë hetimeve, Policia thotë se ka sekuestruar një karikator me fishekë luftarakë, dy bomba Molotov, doza kanabisi, vida, sfera metalike dhe prova të tjera materiale. Sipas deklaratës, grupet e maskuara kanë dëmtuar institucione shtetërore, banka dhe prona publike e private, ndërsa i kanë vënë zjarrin edhe hyrjes së Gjykatës së Lartë.
Policia pretendon gjithashtu se në rrjetet sociale dhe në grupe të hapura janë bërë thirrje për vrasjen e punonjësve të saj dhe djegien e automjeteve të policisë. Ajo u ka bërë thirrje protestuesve të distancohen nga dhuna dhe personat e maskuar, duke paralajmëruar se personat e përfshirë në akte të tilla po identifikohen përmes pamjeve filmike dhe veprimeve të tjera hetimore.
Në deklaratë, Policia u bëri apel edhe prindërve që të mos lejojnë fëmijët të marrin pjesë në protesta, duke argumentuar se jeta e tyre mund të rrezikohet. Ajo theksoi se mbështet të drejtën kushtetuese për tubime paqësore, por u kërkoi pjesëmarrësve të largohen nga elementët e dhunshëm.
Në fund, Policia e Shtetit përgënjeshtroi raportimet se në Shqipëri kanë mbërritur oficerë të policive partnere për të menaxhuar protestat, duke i cilësuar këto lajme të pavërteta dhe dashakeqe.