TIRANË – Agjencia ndërkombëtare e lajmeve Reuters i ka kushtuar një artikull protestave në Shqipëri, ku kryeministri Edi Rama ka hedhur poshtë thirrjet për dorëheqjen e tij, duke deklaruar se zhvillimet e fundit nuk përbëjnë kërcënim për qeverinë, por për rrugën e vendit drejt anëtarësimit në Bashkimin Europian.
Protestat, të udhëhequra nga studentët dhe të nxitura nga pakënaqësitë për korrupsionin e perceptuar, mungesën e vendeve të punës dhe problemet në arsim, kanë përfshirë qendrën e Tiranës dhe, sipas Reuters-it, janë shtrirë edhe në qytete të tjera gjatë javës.
Demonstruesit që kërkojnë largimin e Ramës janë përfshirë në përplasje, ndërsa disa prej tyre kanë vënë zjarrin në ndërtesa qeveritare dhe banka, si dhe kanë hedhur gurë drejt policisë. Forcat e rendit, sipas raportimit, janë kundërpërgjigjur me gaz lotsjellës, ujë me presion dhe plumba gome.
Reuters vëren se trazirat e fundit përbëjnë një sfidë të rëndësishme për Ramën, i cili është në pushtet që prej vitit 2013 dhe vitin e kaluar siguroi mandatin e katërt qeverisës. Protestat pasojnë disa muaj tubimesh, kryesisht paqësore, gjatë verës, të zhvilluara kundër një projekti luksoz në bregdet, të mbështetur nga Jared Kushner, dhëndri i presidentit amerikan Donald Trump.
Gjatë një fjalimi të transmetuar drejtpërdrejt në Facebook, Rama kundërshtoi pretendimet se protestat po kërcënojnë pushtetin e tij, duke e lidhur situatën me të ardhmen europiane të Shqipërisë.
“Nuk po sfidohem unë, nuk po sfidohet qeveria, nuk po sfidohet shumica qeverisëse apo një parti që ka fituar zgjedhjet, por po sfidohet një rrugë, po sfidohet një mision”, deklaroi kryeministri.
Ai iu drejtua gjithashtu qytetarëve me një pyetje për drejtimin që duhet të ndjekë vendi: “Shqiptarët duhet të mendojnë shumë qartë: A e duan këtë, a e duan atë, apo e duan BE-në?”
Sipas Reuters-it, ndërsa Rama po mbante fjalimin, ekskavatorët po punonin për heqjen e gurëve të trotuarit përpara zyrës së tij në qendër të Tiranës, në prag të një tjetër proteste.
Korrupsioni dhe integrimi europian
Në artikull theksohet se skandalet e korrupsionit kanë ndikuar ndër vite në imazhin e Shqipërisë. Reuters citon gjithashtu analistë, sipas të cilëve vendi shërben si qendër për grupe kriminale që synojnë pastrimin e parave të përfituara nga trafiku i drogës dhe armëve.
Nga ana tjetër, Rama ka deklaruar se qeveria e tij po e lufton korrupsionin me më shumë intensitet se më parë.
Shqipëria dhe Mali i Zi përmenden në raportim si vende të rajonit që synojnë anëtarësimin në Bashkimin Europian. Qeveria shqiptare ka vendosur si objektiv vitin 2030 për anëtarësimin e vendit në BE.
Rama flet për ndërhyrje të huaja
Kryeministri ka fajësuar interesa të huaja, të cilat nuk i ka specifikuar, për protestat dhe për atë që e përshkroi si një përpjekje për sulm me dron ndaj zyrës së tij gjatë kësaj jave.
“Zoti e di se cilat do të jenë pasojat. Nuk ka të rinj, nuk ka studentë dhe nuk ka të mitur që do të mendonin qoftë edhe ta zbatonin këtë plan. Kjo është dorë e huaj”, u shpreh Rama.
Ndërkohë, sipas të dhënave të policisë të cituara nga Reuters, 388 persona janë akuzuar për vepra penale në lidhje me demonstratat. Dhjetëra efektivë policie dhe protestues raportohet se kanë mbetur të lënduar gjatë përplasjeve.