Momente të rënda dhe paniku kanë ndodhur pak minuta më parë në sheshin Skënderbej, ku duket se tashmë “lufta” mes policisë dhe protestuesve është bërë e fortë.
Siç shohim nga pamjet direkt nga “Shqipëria Live” dhe raportimet që po bëjnë gazetarët e Top Channel në terren, policia ka vijuar me hedhje uji dhe gazi lotsjellës te protestuesit që qëndronin në shesh.
Ndërkohë, këta të fundit në një moment janë afruar, ku nuk kanë reshtuar bombat molotov. Një prej protestuesve është afruar te autoboti dhe me një shkop druri në dorë ka dhunuar një prej efektivëve.
Një tjetër ka hipur mbi autobotin, ndërsa ka tentuar që të hapë edhe derën e mjetit, por nuk ia ka dalë. Policia ka vijuar me gaz dhe ujë, duke tentuar që t’i shpërndajë ata, e duke ia dalë t’i largojë.
Pas orës 14:00, protestuesit u larguan nga Ministria e Arsimit dhe nisën një marshim nëpër rrugët e Tiranës. Ata kaluan pranë Bashkisë, Kishës Ortodokse, Bllokut të Ministrive, zonës së Toptanit dhe 9-katësheve, për t’u rikthyer sërish drejt qendrës.
Pas rreth një ore marshim, dhuna u zhvendos te selia e Partisë Socialiste. Një grup protestuesish, kryesisht të rinj të maskuar, arritën të kalonin kordonin e policisë dhe nisën të godisnin godinën me gurë e sende të forta, duke thyer xhamat. Nga brenda selisë së PS-së u panë të dilnin edhe persona të maskuar me shkopinj në duar, ndërsa policia ndërhyri me gaz lotsjellës dhe ujë me presion për të shpërndarë protestuesit.
