Situatë lufte në Tiranë. Flakët djegin komisariatin nr 3, disa ministri dhe te selia e PS-së

Aktualitet Kryesore E Diel, 18 Tetor 2026 20:05

Edhe sonte Tirana është pushtuar nga përleshjet mes protestuesve dhe policisë, në ditën e 6-të të protestës që ka dalë nga kontrollit. Nga ana e protestuesve po hidhet me dhjetra e dhjetra bomba me molotov. Dogjën edhe Komisariatin nr.3 në kryeqytet, flakë në dyert e disa Ministrive, si dhe po zhvillohet betejë si në një luftë të vërtetë. Bulevardi kryesor është kthyer arenë lufte. Asnjëherë nuk ka ndodhur kjo në Kryeqytet, përveç luftës së dytë botërore! Zjarr, bomba molotov, gurë që hidhen, gaz lotësjellës, uje me solucion, përleshje trup me trup, ndërtesa shtetrore dhe prona private që janë në flakë. Vetëm armët e zjarrit nuk janë përdorur!

Ora: 20:00. Trazira te Parlamenti. Protesta është zhvendosur pranë godinës së Parlamentit, ku situata është tensionuar pas hedhjes së bombave molotov në drejtim të forcave të policisë. Protestuesit janë përballur me efektivët e rendit, ndërsa hedhja e molotovëve ka rritur tensionet në zonë. Forcat e policisë vijojnë të qëndrojnë në terren për të menaxhuar situatën, ndërsa mbetet për t’u parë se si do të vijojë protesta pranë Parlamentit.

Ora 19:50. Pas përplasjeve te selia e PS-së dhe pranë Bankës së Shqipërisë, protestuesit kanë lëvizur te ”Rruga e Kavajës”, ndërkohë Policia e Shtetit po i ndjek nga pas. E njëjta formë u dha edhe në orët e kaluara, ku efekivët ndiqnin këmba-këmbës në rrugicat e Tiranës protestuesit.

Ora 19:20. Protestuesit janë rikthyer në selinë e PS-së, ku në orët e drekës të kësaj të diele, ata hodhën molotov dhe thyen xhamat e dritarëve. Nga brenda selisë kanë dalë disa persona të pajisur me shkopinj, të cilët kanë sulmuar protestuesit. Nuk dihet nëse janë efektivë civilë apo thjesht anëtarë të Partisë Socialiste.

Ora 19:00. Traizrat në këtë ditë të 6-të të protestës studentore, po vijon me një kaos të madh. Tensionet vijojnë mes protestuesve dhe forcave të Policisë së Shtetit në Bulevardin ”Dëshmorët e Kombit”, ku protestuesit kanë shpërthyer fishekzjarrë në drejtim të autobotëve dhe kanë përdorur gjithashtu lazer. Në përgjigje, Policia e Shtetit ka përdorur ujë me autobotë për të larguar protestuesit dhe për të mbajtur turmën larg kordonit të forcave të rendit. Situata mbetet e tensionuar, ndërsa përballja mes protestuesve dhe policisë vijon në zonë.

Ora 18:16 dhe protestuesit janë zhvendosur tashmë pranë Komisariatit numër 3 në Tiranë, ku kanë ndezur zjarr. 4 efektivë janë lënduar. Zona është kthyer në një fushë betejë të vërtetë, ku ka pasur edhe zjarrvënie. Protestuesit i kanë vendosur zjarrin Komisariatit numër në 3 në kryeqytet. Efektivët janë duke marrë masa rrethanore, për të shuar flakët.

Një numër shumë i madh fishekzjarrësh është hedhur nga protestuesit në drejtim të policisë këtë mbrëmje. Protestuesit hedhin fishekzjarrë drejt efektivëve të policisë, skenë kjo e ndodhur pas Bankës së Shqipërisë. Ata janë larguar nga Sheshi Skënderbej dhe po tentojnë të kthehen sërish te Ministria e Arsimit. Ora shënon 17:23 dhe përshkallëzohet protesta studentore në Tiranë. Protestuesit kanë hedhur breshëri molotovësh drejt Policisë, e cila qëndronte e rreshtuar përballë tyre dhe që kishin ngecur mes Ministrisë së Bujqësisë dhe asaj të Ekonomisë. Pas hedhjes së molotovëve, flakët kanë shpërthyer te këmbët e efektivëve, ndërsa menjëherë ndaj protestuesve është hedhur ujë me presion, duke nisur shpërndarjen e tyre.

Policia e Shtetit po përdor plumba gome dhe kjo vjen pas tensioneve të krijuara në zonë, ku policia ka përdorur më herët gaz dhe ujë, ndërsa protestuesit kanë hedhur gurë në drejtim të forcave të rendit. Përplasjet po zhvillohen pranë kordonit policor, i vendosur për të penguar avancimin e protestuesve drejt Kryeministrisë.

Tensionet janë rikthyer, ku protesta është shoqëruar me përplasje mes demonstruesve dhe forcave të policisë. Efektivët kanë përdorur gaz dhe ujë për të shpërndarë turmën, ndërsa protestuesit janë kundërpërgjigjur duke hedhur gurë në drejtim të policisë. Për të ndaluar lëvizjen e protestuesve drejt Kryeministrisë, uniformat blu kanë krijuar një kordon sigurie, duke tentuar të frenojnë avancimin e turmës. Situata vijon të mbetet e tensionuar, ndërsa protesta po zhvillohet mes përplasjeve dhe përballjes së drejtpërdrejtë mes palëve.

Është ora 16:30 dhe protesta e qytetarëve në Tiranë është shtrirë edhe përtej Bulevardit ”Dëshmorët e Kombit” dhe trazirave para Kryeministrisë, duke kaluar në rrugicat e Tiranës. Policia po ndjek protestuesit këmba-këmbës në zonën e ”Zogut të Zi”, ndërsa gjatë përplasjeve janë djegur kazanë të mbeturinave. Në terren janë vendosur autobotët e ujit, të cilët po përdoren në përpjekje për të shpërndarë turmën. Situata mbetet e tensionuar, me efektivët e policisë dhe protestuesit përballë njëri-tjetrit.

Tre persona kanë mbërritur deri më tani në Spitalin Universitar të Traumës, pas incidenteve të shënuara gjatë protestës së 18 tetorit. Lajmi bëhet i ditur nga Ministria e Shëndetësisë dhe Mirëqenies Sociale, në një njoftim të publikuar në orën 16:00. Personat që po marrin trajtim mjekësor janë një efektiv policie, një i mitur 15-vjeçar dhe një përfaqësuese e medias. Gjendja shëndetësore e të treve paraqitet e qëndrueshme. Ata po kryejnë ekzaminimet përkatëse dhe po marrin trajtimin nga stafet mjekësore dhe infermierore.

Ora shënon 15:40 dhe përplasja mes protestuesve dhe policisë u zhvendos para Kryeministrisë, ndërkohë që protesta është në ditën e 6-të saj. Studentët dhe gjimnazistët lëshuar një breshëri gurësh në drejtim të autoboteve dhe uniformave blu. Më herët sot incidente të dhunshme u shënuan te Ministria e Arsimit, si dhe te selia e PS, ku protestuesit thyen xhamat e godinës. Protestuesit kanë ndaluar para selisë së Partisë Socialiste, ku kanë nisur ta sulmojnë godinën me gurë, duke goditur edhe pjesën e derës dhe duke thyer xhamat. Forcat e Policisë ndodheshin pranë zonës, por nuk ndërhynë menjëherë. Pak çaste më vonë, efektivët hodhën gaz lotsjellës me qëllim shpërndarjen e turmës.

Sakaq nga brenda selisë, kanë dalë disa persona me shkopinj duke sulmuar protestuesit. Ata kanë thënë se janë anëtarë të Partisë Socialiste. Nga ana tjetër, policia ndërhyri duke hedhur gaz lotsjellës dhe ujë me presion drejt protestuesve me qëllim shpërndarjen e tyre.

Kreu i grupit parlamentar të Partisë Socialiste, Taulant Balla, ka reaguar ashpër për protestën e zhvilluar pranë selisë së Partisë Socialiste, duke akuzuar organizatorët se pas saj qëndrojnë persona të paguar dhe ndikime të huaja. Në një mesazh të publikuar, Balla i drejtohet Sali Berishës, duke pretenduar se personat e përfshirë në protestë janë të financuar prej tij, si edhe nga Agron Shehaj dhe Arlind Qorri. “O Sali Largoji urgjent njerëzit që çove tek selia e Partisë Socialiste! Janë të gjithë njerëzit e tu të paguar nga ti dhe nga Agron Shehaj, Arlind Qorrri dhe duart e huaja. Kush donte prova e kujt është protesta besoj e morët”, shkruan Balla.

Përplasjet nisën më herët pranë Ministrisë së Arsimit, ku protestuesit sulmuan me gurë dhe molotov autobotin e policisë. Uniformat blu u kundërpërgjigjën me gaz lotsjellës dhe ujë me presion, duke bërë që turma të zhvendosej drejt qendrës së kryeqytetit. Bilanci i pesë ditëve të para të protestave ishte 272 persona të lënduar, mes tyre 169 punonjës policie, 82 protestues dhe 21 kalimtarë.

Protesta e sotme nisi me një detaj ndryshe, ku disa të rinj kanë kërcyer dhe kënduar në mes të rrugës, para efektivëve të Policisë. Njëri prej protestuesve, pasi u ka bërë thirrje bashkëprotestuesve të mos ushtrojnë dhunë ndaj efektivëve të Policisë, si dhe këtyre të fundit që të mos dhunojnë protestuesit, në shenjë revolte grisi certifikatën që i ishte dhënë nga ish-ministrja e Arsimit, Besa Shahini, si fitues i Olimpiadës së Historisë.

Pas pak momenteve qetësie, nisën tensionet dhe hedhja e gurëve në drejtim të policisë, e cila është po qëndron pranë Ministrisë së Arsimit. Nga tensionet ka mbetur e lënduar një gazetare, e cila u largua nga zona e protestës me ambulancë. Polica më pas i ka larguar ata drejt qendrës, teksa disa prej protestuesve janë shoqëruar në komisariate.