Partia Demokratike e Kosovës (PDK) ka reaguar lidhur me raportimet për largimin e mundshëm të Bedri Hamzës nga drejtimi i partisë, duke sqaruar se deri më tani nuk është marrë asnjë vendim zyrtar për këtë çështje.
Në një përgjigje për Telegrafin, Zyra për Informim e PDK-së ka rikujtuar se Hamza ka deklaruar publikisht se, me hapjen e procesit të zgjedhjeve të brendshme, do të japë dorëheqje dhe nuk do të rikandidojë për postin e kryetarit.
“Nuk ka asnjë vendim zyrtar lidhur me këtë çështje. Kryetari Hamza e ka bërë të ditur publikisht se, kurdo që hapet procesi i zgjedhjeve të brendshme, do të japë dorëheqje dhe nuk do të rikandidojë më”, thuhet në përgjigjen e Zyrës për Informim të PDK-së për Telegrafin.
Nga kjo parti kanë bërë të ditur se aktualisht janë të përqendruar në finalizimin e hapave për mbështetjen e mbrojtjes së ish-krerëve të Ushtrisë Çlirimtare të Kosovës (UÇK) në Hagë, në fazën e apelit.
“Për çdo vendim dhe zhvillim zyrtar brenda partisë, do t’ju njoftojmë në kohën e duhur”, thuhet më tej në përgjigjen e PDK-së.
Reagimi vjen pas raportimeve për një largim të mundshëm të Hamzës nga drejtimi i partisë dhe për emrin e personit që mund të marrë përkohësisht detyrën e kryetarit.
I pyetur nga Telegrafi për këtë çështje, Xhavit Haliti ka deklaruar se nuk ka dëgjuar për një zhvillim të tillë. Ndërsa Ganimete Musliu ka thënë se kjo çështje ende nuk është diskutuar.
#PDK #BedriHamza #Kosovë #Politikë #XhavitHaliti #GanimeteMusliu #Lajme