Qendra Kombëtare e Urgjencës Mjekësore (QKUM) ka reaguar lidhur me pretendimet se autoambulancat po përdoren për transportimin e gazit lotsjellës gjatë protestave në Tiranë.
Përmes një reagimi zyrtar, QKUM i ka hedhur poshtë këto aludime, duke theksuar se autoambulancat dhe ekipet mjekësore ndodhen në terren për t’u ardhur në ndihmë personave që kanë nevojë për trajtim urgjent.
Institucioni u ka bërë thirrje protestuesve që të mos pengojnë lëvizjen e autoambulancave dhe të mos ushtrojnë dhunë ndaj mjeteve apo personelit mjekësor.
Sipas Qendrës Kombëtare të Urgjencës Mjekësore, pengimi i qarkullimit dhe incidentet ndaj ekipeve shëndetësore vonojnë ndërhyrjet emergjente dhe rrezikojnë drejtpërdrejt jetën e pacientëve që kanë nevojë për ndihmë të menjëhershme.
QKUM thekson gjithashtu se veprime të tilla vënë në rrezik edhe sigurinë e personelit mjekësor, i cili është në terren për të ofruar ndihmë gjatë situatave emergjente.
Reagimi vjen në një kohë kur protestat në kryeqytet janë shoqëruar me tensione dhe përplasje, ndërsa institucionet u bëjnë thirrje qytetarëve të mos pengojnë shërbimet e emergjencës dhe të respektojnë punën e ekipeve mjekësore.
REAGIM DHE PËRGENJESHTRIM ZYRTAR | QKUM:
Në lidhje me disa lajme të rreme që po qarkullojnë në rrjetet sociale ku pretendohet se autoambulancat po përdoren për furnizim me gaz lotësjellës, përgenjeshtrojmë kategorikisht këtë informacion!
Informojmë të gjithë qytetarët dhe protestuesit se:
🚑 Misioni ynë: Autoambulancat dhe ekipet mjekësore janë në terren VETËM për t’u ardhur në ndihmë personave që kanë nevojë për ndihmë të shpejtë mjekësore.
⚠️ Thirrje për ndërgjegjësim: Pengimi i qarkullimit dhe aktet e dhunës ndaj ambulancave apo ekipeve mjekësore vonojnë ndërhyrjen emergjente dhe rrezikojnë drejtpërdrejt jetën e pacientëve në nevojë, si dhe sigurinë e stafit tonë.
📋 Lista e targave të mjeteve aktualisht në shërbim aktiv:
🔹 AC 410 AC | AC 878 AC | AC 656 AC | AC 342 AC
🔹 AB 657 CF | AB 703 CF | AB 946 CF | AB 776 CF
🔹 AA 813 VU | AA 874 VU | AB 245 FV | AB 846 CF
📞 Për çdo urgjencë mjekësore, telefononi menjëherë në numrin pa pagesë: 127
Së bashku për të mbrojtur jetën! 🏥