Europa po përjeton një fundjavë protestash të mëdha, që në disa prej qyteteve kryesore janë shndërruar në përplasje të dhunshme mes demonstruesve dhe forcave të policisë. Nga Parisi në Milano, nga Lioni në Torino e Bolonja, mijëra qytetarë kanë dalë në rrugë kundër shtrenjtimit të jetesës, pagave të ulëta dhe përkeqësimit të shërbimeve publike. Në disa vende, në krye të protestave janë të rinjtë, ndërsa pakënaqësia sociale po merr përmasa gjithnjë e më të mëdha.
Franca është përballur me përplasjet më të gjera. Pas protestave masive të së shtunës, tensionet u rikthyen edhe këtë të diel në Paris. Qindra demonstrues u mblodhën në Place de la République, ku pati hedhje sendesh ndaj policisë, tentativa për ngritjen e barrikadave dhe ndërhyrje të forcave të rendit me gaz lotsjellës e granata zhurmuese. Sipas AFP-së, bilanci i ndalimeve nga trazirat e së shtunës kishte arritur në rreth 2 mijë persona në të gjithë Francën.
Një ditë më parë, skena të rënda ishin regjistruar edhe në Lion, Marsejë dhe Limoges, ku ndërtesa historike e bashkisë u përfshi nga flakët. Në disa qytete u sulmuan ndërtesa publike, u shkatërruan dyqane dhe u plaçkitën biznese. Autoritetet franceze u gjendën përballë një mobilizimi që tejkaloi parashikimet e tyre.
Në Itali, Milano u kthye në epiqendrën e trazirave. Për të dytën ditë radhazi, qindra të rinj, disa të maskuar, u mblodhën në Piazza Duomo dhe rrugët përreth. Grupe demonstruesish thyen vitrina, dëmtuan dyqane dhe u përplasën me policinë, e cila ndërhyri me gaz lotsjellës dhe ujë me presion. ANSA raportoi se gjatë së dielës 160 persona ishin shoqëruar në komisariat për identifikim. Nga përplasjet e së shtunës ishin raportuar 25 të plagosur, mes tyre 10 policë.
Trazirat në Itali nuk u kufizuan vetëm në Milano. Edhe Torino e Bolonja u përfshinë nga protesta dhe incidente, ndërsa kryeministrja Giorgia Meloni dënoi dhunën dhe paralajmëroi masa për garantimin e rendit publik.
Protesta janë regjistruar gjithashtu në Belgjikë, ku studentët kundërshtojnë kostot e arsimit, si dhe në Portugali e Spanjë, ku kriza e strehimit dhe rritja e qirave janë ndër arsyet kryesore të pakënaqësisë. Megjithatë, këto mobilizime kanë shkaqe dhe dinamika të ndryshme dhe nuk përbëjnë një lëvizje të vetme të organizuar në nivel europian.
Në këtë panoramë përfshihet edhe Tirana, e cila këtë të diel ka hyrë në ditën e gjashtë të protestave të nisura nga studentët dhe të shoqëruara me përplasje të forta me policinë. Ndryshe nga protestat në Francë dhe Itali, ku mbizotërojnë kërkesat ekonomike dhe sociale, në Shqipëri revolta ka marrë edhe një karakter të drejtpërdrejtë politik, me kërkesa për dorëheqjen e kryeministrit Edi Rama.
Nga Parisi në Tiranë, pamjet e fundjavës kanë një ngjashmëri të dukshme: të rinj në rrugë, forca policore me pajisje speciale, gaz lotsjellës, barrikada dhe institucione të rrethuara. Shkaqet nuk janë të njëjta, por pakënaqësia ndaj qeverisjes dhe institucioneve po shfaqet në disa kryeqytete europiane njëkohësisht.
Europa po mbyll kështu një fundjavë të trazuar, ndërsa qeveritë përballen jo vetëm me kërkesat e protestuesve, por edhe me pyetjen se si mund të rikthehet qetësia pa e thelluar më tej përplasjen mes qytetarëve dhe shtetit.
