Tirana kthehet në fushëbetejë: Dita e gjashtë e përplasjeve mes policisë dhe protestuesve

dsc 5835 — Një efektiv i forcave speciale të policisë, i pajisur me maskë kundër gazit dhe armë për hedhjen e municioneve speciale, gjatë operacionit policor në qendër të Tiranës. | Foto: Xhemali Moku/BIRN

Bulevardi “Dëshmorët e Kombit” në Tiranë u kthye sërish në skenë përplasjesh të dhunshme të dielën, më 18 tetor, ndërsa protestat e të rinjve që kërkojnë dorëheqjen e kryeministrit Edi Rama hynë në ditën e gjashtë radhazi.

Forcat e policisë, të pajisura me skafandra, mburoja dhe maska kundër gazit, u vendosën përgjatë bulevardit dhe në sheshet kryesore të kryeqytetit, të mbështetura nga automjete të blinduara dhe ujëhedhëse. Përballë tyre, demonstruesit vijuan protestën mes përplasjeve, shpërthimeve të mjeteve piroteknike dhe përdorimit të gazit lotsjellës.

Përplasjet u përshkallëzuan gjatë mbrëmjes, kur retë e dendura të gazit mbuluan pjesë të qendrës së Tiranës, ndërsa shpërthimet dhe ndërhyrjet e forcave të rendit krijuan skena kaotike në rrugët përreth.

Dita e gjashtë e protestave shënoi vazhdimin e një krize që ka nxjerrë mijëra të rinj në rrugë dhe ka vënë në qendër të debatit publik jo vetëm kërkesën për dorëheqjen e qeverisë, por edhe mënyrën se si Policia e Shtetit po menaxhon demonstratat.

Fotografitë e realizuara nga Xhemali Moku për BIRN dokumentojnë përballjen mes policisë dhe protestuesve, përdorimin e mjeteve të kontrollit të turmës dhe atmosferën e tensionuar që mbizotëroi në kryeqytet nga orët e pasdites deri natën vonë.