Ministri i Punëve të Brendshme, Ervin Demo, ka reaguar lidhur me përshkallëzimin e protestës një ditë më parë në kryeqytet.
Në një konferencë për media së bashku me kryeministrin Edi Rama, Demo u shpreh se shumë efektivë kanë mbetur sipas tij të plagosur, ndërsa shtoi se në protestën e djeshme është kaluar vija e kuqe.
“Ka ndodhur diçka që ka kaluar vijën e kuqe dje. Komisariati numër 3 është sulmuar nga protestuesit. Janë dëmtuar punonjës policie deri me djegie të trupit të tyre, duke mbrojtur godinën e Policisë së Shtetit. Elementët e dhunës kanë arritur nivele që tregojnë se nuk është protestë studentore. Kemi pasur sulme ndaj objekteve të caktuara politike, por ka edhe nga ata të mitur që kanë gjetur azil politik në një parti të caktuar. Janë 295 të lënduar në këto 6 ditë të fundit. 186 janë punonjës policie. Ju jeni ata që duhet të keni mbështetje maksimale. Dhuna nuk ka vend në një shoqëri demokratike”, theksoi ai.
