Një jaht luksoz 80 metra i gjatë është vërejtur vazhdimisht në imazhet satelitore pranë qytetit bregdetar të Wonsanit, në Korenë e Veriut, nga korriku deri në mesin e tetorit të këtij viti. Sipas analizës së BBC-së, lëvizjet e tij mund të lidhen me përdorimin nga lideri koreano-verior Kim Jong Un dhe familja e tij. Ajo që bie veçanërisht në sy në këtë mjet lundrues është një pishinë rreth 50 metra e gjatë, e shoqëruar me disa rrëshqitëse ujore të vendosura në njërin skaj të kuvertës.
Pas disa muajsh qëndrimi në një kantier mirëmbajtjeje, jahti u zhvendos në fillim të korrikut drejt ujërave pranë gadishullit Kalma, në afërsi të një vile që përdoret nga Kim Jong Un dhe familja e tij. Sipas BBC-së, nuk bëhet fjalë për të vetmin mjet luksoz të vërejtur në këtë zonë. Katër anije me gjatësi rreth 50, 55, 60 dhe 80 metra janë identifikuar vazhdimisht pranë rezidencës së liderit gjatë këtij viti. Ish-zyrtarë koreano-veriorë, dezertorë dhe ekspertë vlerësojnë se mjete të tilla janë të lidhura me elitën drejtuese të vendit.
Ri Jong Ho, ish-zyrtar i një strukture të Partisë së Punëtorëve që dyshohet se merret me administrimin e valutës së huaj për udhëheqjen, tha se anijet zakonisht qëndrojnë në kantier gjatë dimrit dhe përdoren për argëtim gjatë verës.
