Kryetari i Delegacionit të Parlamentit Europian për Marrëdhëniet me Shqipërinë, Marco Tarquinio, dhe raportuesi i përhershëm për Shqipërinë, Andreas Schieder, shprehën të hënën shqetësim të thellë për përshkallëzimin e dhunës gjatë protestave kundër qeverisë së kryeministrit Edi Rama, duke dënuar sulmet ndaj institucioneve dhe pronës, si dhe duke kërkuar përmbajtje nga forcat e rendit.
Në një deklaratë të përbashkët të publikuar më 19 tetor në Bruksel, dy eurodeputetët dënuan përshkallëzimin e dhunshëm të protestave, sulmet ndaj institucioneve publike dhe shkatërrimin e pronës publike e private.
“U bëjmë thirrje protestuesve të tregojnë përmbajtje maksimale dhe të shmangin çdo akt dhune, pasi veprime të tilla nuk kontribuojnë në zgjidhjen e situatës dhe nuk kanë vend në demokraci”, thuhet në deklaratë.
Megjithatë, përfaqësuesit e Parlamentit Europian ngritën shqetësime edhe për sjelljen e forcave të rendit gjatë përballjes me demonstruesit.
“Shprehim gjithashtu shqetësim serioz për raportimet mbi përdorimin e tepruar të forcës policore ndaj protestuesve”, theksuan ata, duke u bërë thirrje autoriteteve të tregojnë vetëpërmbajtje.
Tarquinio dhe Schieder kërkuan që institucionet përgjegjëse të bëjnë gjithçka për të identifikuar dhe vendosur përpara përgjegjësisë autorët e çdo akti dhune, përfshirë rastet e përdorimit të tepruar të forcës nga policia.
Deklarata vjen pas gjashtë ditësh protestash të njëpasnjëshme në Tiranë dhe qytete të tjera të Shqipërisë, gjatë të cilave mijëra të rinj kanë kërkuar dorëheqjen e kryeministrit Edi Rama. Protestat janë shoqëruar me përplasje të dhunshme mes demonstruesve dhe policisë, përdorimin e gazit lotsjellës dhe arrestime të shumta, ndërsa janë raportuar gjithashtu dëmtime të institucioneve, bizneseve dhe pronës private.
Dy eurodeputetët theksuan se liria e tubimit paqësor dhe e shprehjes janë të drejta themelore, të mbrojtura nga Karta e të Drejtave Themelore e Bashkimit Europian dhe Konventa Europiane për të Drejtat e Njeriut.
“Protestuesit, në këtë rast të rinjtë, kanë të drejtë të shprehin pikëpamjet e tyre, veçanërisht për çështje që ndikojnë drejtpërdrejt në të ardhmen e tyre”, thuhet në deklaratë.
Ata u kërkuan autoriteteve shqiptare të garantojnë ushtrimin e lirë të së drejtës së tubimit dhe protestës paqësore, ndërsa bënë thirrje për një dialog konstruktiv dhe të sinqertë mes të gjitha palëve, me qëllim gjetjen e një zgjidhjeje që adreson pakënaqësitë e shprehura nga protestuesit.
Në përfundim, Tarquinio dhe Schieder e lidhën respektimin e shtetit të së drejtës me perspektivën europiane të Shqipërisë.
“Respektimi i shtetit të së drejtës mbetet kriteri themelor dhe kusht i detyrueshëm për përparimin e Shqipërisë në rrugën e anëtarësimit në Bashkimin Europian”, përfundon deklarata.
