Presidenti rus Vladimir Putin ka propozuar një samit muajin e ardhshëm me Presidentin amerikan Donald Trump dhe udhëheqësin kinez Xi Jinping, për të negociuar një zgjidhje të konfliktit katërvjeçar në Ukrainë, e cila do të ishte në favor të Moskës. Kështu raportoi të dielën gazeta "Ëall Street Journal", duke cituar burime të njohura me këto diskutime. Propozimi për samitin vjen në një kohë kur marrëdhëniet mes Trump-it dhe Putinit po përmirësohen, veçanërisht pasi Presidenti amerikan njoftoi një marrëveshje për blerjen e naftës ruse dhe nënshkroi të premten një urdhër që heq sanksione kyçe ndaj Moskës. Duke iu referuar një ish-oficeri të inteligjencës ruse të informuar mbi çështjen, gazeta shkruan se propozimi i Putinit u bë gjatë një bisede telefonike me Trump-in më 9 tetor, bisedë në të cilën u arrit edhe marrëveshja për naftën mes dy vendeve. Sipas raportimit të ËSJ-së, i cili citon burime të njohura me diskutimet, Kremlini ka propozuar që ky dialog trepalësh të zhvillohet në margjinat e samitit të ardhshëm të Bashkëpunimit Ekonomik Azi-Paqësor (APEC). Ky samit është planifikuar të mbahet më 18 dhe 19 nëntor në Shenzhen. Zëdhënësi i Kremlinit, Dmitry Peskov, konfirmoi për "Ëall Street Journal" se po zhvillohen diskutime lidhur me një takim të mundshëm. "Ende nuk ka një marrëveshje të qartë për vetë takimin apo për agjendën e tij të mundshme, megjithëse të tria palët e pranojnë mundësinë hipotetike që një takim i tillë të zhvillohet," deklaroi ai për gazetën.