Akademikja dhe ish deputetja socialiste, Ledi Shamku Shkreli ka shprehur mbështetjen për protestat studentore në Shqipëri, teksa ka sjellë si shembull një episod nga Universiteti i Bolonjës në Itali, ku, pedagogët u solidarizuan me protestuesit dhe nuk lejuan hyrjen e policisë në ambientet universitare.
Në një postim në rrjetet sociale, Shkreli shkruan se kolegët e saj në universitetin italian vetëdeklarohen antifashistë dhe se, gjatë një proteste studentore, pedagogët mbyllën dyert për të mbrojtur protestuesit, ndërsa brenda vijonte ceremonia e diplomimit.
“Të gjithë kolegët e mi më në zë në Universitetin e Bolonjës, Universiteti më i vjetër në botë, ndër më të mirët sot në botë e më i miri në Itali, të gjithë vetëdeklarohen në krenari Antifashistë, ose shkurt Antifa”, shkruan ajo.
Më tej, akademikja rrëfen se pedagogët u solidarizuan me studentët dhe mbajtën policinë jashtë ambienteve të universitetit.
“Në protestën e fundit studentore të gjithë kolegët mbyllëm dyert, mbrojtëm protestuesit dhe mbajtëm jashtë policinë. Ndërkohë që brenda vijonte diplomimi i studentëve. Ka qenë një nga pamjet më të bukura të oborreve të brendshme universitare. Preferoj të kem ‘gabim’ me ata!”, shprehet Shkreli.
