Një ngjarje e rëndë kriminale ka tronditur zonën e Bathores në Kamëz, ku dy vëllezër kanë humbur jetën dhe vëllai i tyre i tretë ka mbetur i plagosur rëndë pas të shtënave me armë zjarri.
Për ngjarjen është arrestuar autori i dyshuar, Ngushëllim Manzi, 40 vjeç, punonjës i Policisë Ushtarake.
Viktimat janë Selam Islamaj, 30 vjeç, dhe Nazmi Islamaj, 48 vjeç. I pari humbi jetën në vendngjarje, ndërsa 48-vjeçari u plagos dhe u transportua drejt spitalit, ku ndërroi jetë si pasojë e plagëve të marra.
Vëllai i tretë, Shefqet Islamaj, rreth 44 vjeç, mbeti gjithashtu i plagosur nga të shtënat dhe vijon të jetë nën kujdesin e mjekëve.
Sipas njoftimit të Policisë, ngjarja ka ndodhur në rrugën “Petrela”, në Bathore, pas një konflikti për motive të dobëta mes Manzit dhe tre vëllezërve Islamaj.
Përplasja dyshohet se është përshkallëzuar deri në përdorimin e armës së zjarrit.
Njoftimi i policisë:
Vrau me armë zjarri, për motive të dobëta, 2 shtetas dhe plagosi 1 tjetër, kapet dhe vihet në pranga autori i dyshuar.
Pas njoftimit të marrë për të shtëna me armë zjarri, në rrugën “Petrela”, në Bathore, shërbimet e Komisariatit të Policisë Nr. 5 shkuan menjëherë në vendngjarje.
Nga veprimet e para rezultoi se, gjatë një konflikti për motive të dobëta ndërmjet shtetasit N. M. dhe tre vëllezërve, S. I., N. I. dhe Sh. I., konflikti u përshkallëzua në përdorimin e armës së zjarrit. Si pasojë, shtetasi S. I., rreth 30 vjeç, humbi jetën, ndërsa shtetasit N. I., 48 vjeç, dhe Sh. I., rreth 44 vjeç, u plagosën dhe u transportuan për në spital, ku 48-vjeçari humbi jetën, ndërsa 44-vjeçari vijon të jetë në kujdesin e mjekëve.
Si rezultat i veprimeve të shpejta policore, u kap dhe u arrestua autori i dyshuar i rastit, shtetasi N. M., rreth 40 vjeç, punonjës i Policisë Ushtarake.
Gjithashtu, u sekuestrua arma e zjarrit (pistoletë), e dyshuar e përdorur për krimin.
Grupi hetimor po vijon punën për dokumentimin e plotë ligjor të ngjarjes dhe sqarimin e rrethanave të saj.
