Dhoma Kombëtare e Avokatisë vendosi këtë të martë bojkotin e seancave gjyqësore nga data e sotme, deri në pezullimin e rregullores së Gjykatës së Posaçme, që ndalon përdorimin e celularit.
“Kërkojmë pezullimin e menjëhershëm të rregullores së Gjykatës së Posaçme“, tha kreu i Dhomës së Avokatisë, Maks Haxhia.
Bojkoti, sipas tyre, nuk do zbatohet vetëm për masat e sigurisë. Dhoma e Avokatisë kërkoi pezullimin e menjëhershëm të rregullores dhe rishikimin e saj në tërësi.
Gjykata e Posaçme e Shkallës së Parë për Korrupsionin dhe Krimin e Organizuar ka miratuar një rregullore të re, e cila përcakton një sërë rregullash për hyrjen në godinë, ndjekjen e seancave gjyqësore dhe aktivitetin e medias.
Kjo praktikë është kundërshtuar nga palët e prekura nga këto masa kufizuese, ndaj kanë kërkuar rishikimin e saj.
Gjatë fjalës së tij, Haxhia u shpreh se kushdo që thyen bojkotin do të ndëshkohet me heqje licence.
“Ndaj të gjithë avokatët që do thyejnë këtë bojkot, do dalin në kundërshtim me këtë vendim do të procedohen displinarisht nga Dhoma e Avokatisë me masë ekstreme: heqjen e licencës”, tha ai.
