PE reagon për revoltën: Shqetësim mbi përdorimin e tepruar të forcës policore

Parlamenti Europian ka reaguar përmes një deklarate të përbashkët për zhvillimet e fundit në Shqipëri, duke shprehur shqetësim për përshkallëzimin e protestave, dhunën e ushtruar ndaj institucioneve dhe raportimet për përdorim të tepruar të forcës policore.

Deklarata mban firmën e Marco Tarquinio, kryetar i Delegacionit të Parlamentit Europian për Marrëdhëniet me Shqipërinë, dhe Andreas Schieder, raportues i përhershëm për vendin tonë. Të dy eurodeputetët u kanë bërë thirrje protestuesve të shmangin aktet e dhunës, ndërsa autoriteteve u kërkojnë vetëpërmbajtje dhe respektim të të drejtave themelore.

Në reagimin e publikuar më 19 tetor 2026, në Bruksel, përfaqësuesit europianë dënojnë sulmet ndaj institucioneve publike dhe dëmtimin e pronës publike e private. Sipas tyre, dhuna nuk ndihmon në zgjidhjen e mosmarrëveshjeve dhe nuk përputhet me parimet e një shoqërie demokratike.

Megjithatë, deklarata nuk ndalet vetëm te sjellja e protestuesve. Tarquinio dhe Schieder ngrenë shqetësimin edhe për raportimet mbi përdorimin e tepruar të forcës nga policia, duke kërkuar që institucionet përgjegjëse të hetojnë çdo incident dhe të përcaktojnë përgjegjësitë individuale, pavarësisht se nga cila palë janë kryer shkeljet.

Parlamenti Europian: Të hetohen edhe rastet e përdorimit të tepruar të forcës

Në deklaratën e tyre, eurodeputetët theksojnë se autoritetet duhet të garantojnë rendin publik pa cenuar të drejtat e qytetarëve. Ata kërkojnë që çdo rast i dyshuar i përdorimit të tepruar të forcës policore të shqyrtohet nga institucionet përkatëse.

Një vëmendje e veçantë i kushtohet të drejtës për tubim paqësor dhe lirisë së shprehjes, të cilat mbrohen nga Karta e të Drejtave Themelore të Bashkimit Europian dhe Konventa Europiane për të Drejtat e Njeriut.

Sipas dy përfaqësuesve të Parlamentit Europian, të rinjtë kanë të drejtë të shprehin qëndrimet dhe pakënaqësitë e tyre, veçanërisht kur bëhet fjalë për çështje që ndikojnë drejtpërdrejt në të ardhmen e tyre. Për këtë arsye, autoritetet shqiptare ftohen të garantojnë ushtrimin e kësaj të drejte dhe të mbrojnë zhvillimin e protestave paqësore.

Thirrje për dialog dhe respektim të shtetit të së drejtës

Në përfundim të deklaratës, Tarquinio dhe Schieder kërkojnë një dialog paqësor, konstruktiv dhe të sinqertë mes të gjithë aktorëve, me synimin për të gjetur zgjidhje për pakënaqësitë e shprehura nga protestuesit.

Sipas tyre, çdo zgjidhje duhet të jetë në përputhje me legjislacionin shqiptar dhe standardet europiane, ndërsa respektimi i shtetit të së drejtës mbetet një kusht themelor për përparimin e Shqipërisë drejt anëtarësimit në Bashkimin Europian.

Reagimi i Parlamentit Europian vjen në një moment tensionesh të shtuara në vend, ku krahas akteve të dhunës dhe dëmtimit të pronës, në qendër të debatit publik janë vendosur edhe mënyra e ndërhyrjes së policisë dhe garantimi i të drejtës për protestë.

Deklarata e plotë është firmosur nga:

• Marco Tarquinio, kryetar i Delegacionit të Parlamentit Europian për Marrëdhëniet me Shqipërinë.
• Andreas Schieder, raportues i përhershëm i Parlamentit Europian për Shqipërinë.

Komunikata:

Deklaratë e përbashkët e Kryetarit të Delegacionit dhe Raportuesit të Përhershëm për Shqipërinë

Bruksel, 19 tetor 2026

Në emër të Delegacionit të Parlamentit Evropian për Marrëdhëniet me Shqipërinë dhe në cilësinë e Raportuesit të Përhershëm të Parlamentit Evropian për Shqipërinë, shprehim shqetësimin tonë të thellë për ngjarjet e fundit që kanë ndodhur në vend, veçanërisht në Tiranë.

Dënojmë përshkallëzimin e dhunshëm të këtyre protestave, sulmet ndaj institucioneve publike dhe shkatërrimin e pronës publike dhe private. U bëjmë thirrje protestuesve të tregojnë përmbajtje maksimale dhe të përmbahen nga çdo akt dhune, pasi ato nuk kontribuojnë në gjetjen e një zgjidhjeje dhe nuk kanë vend në demokraci.

Shprehim gjithashtu shqetësim serioz për raportimet mbi përdorimin e tepruar të forcës policore ndaj protestuesve. U bëjmë thirrje autoriteteve të tregojnë vetëpërmbajtje. Gjithashtu, u bëjmë thirrje institucioneve përkatëse të bëjnë gjithçka që është e mundur për të përcaktuar përgjegjësinë individuale për çdo akt dhune, përfshirë rastet e përdorimit të tepruar të forcës.

Theksojmë se e drejta për lirinë e tubimit paqësor dhe të shprehjes mbrohet si nga Karta e të Drejtave Themelore të Bashkimit Evropian, ashtu edhe nga Konventa Evropiane për të Drejtat e Njeriut. Protestuesit, në këtë rast të rinjtë, kanë të drejtë të shprehin pikëpamjet e tyre, veçanërisht për çështjet që ndikojnë drejtpërdrejt në të ardhmen e tyre. Për këtë arsye, u bëjmë thirrje autoriteteve të mbrojnë ushtrimin e së drejtës së lirisë së tubimit, përfshirë protestat paqësore.

Bëjmë thirrje për një dialog paqësor, konstruktiv dhe të sinqertë ndërmjet të gjithë aktorëve, me synimin për të gjetur një zgjidhje kuptimplotë për adresimin e çdo pakënaqësie të shprehur nga protestuesit, në përputhje me ligjet shqiptare dhe standardet evropiane. Respektimi i shtetit të së drejtës mbetet kriteri kryesor dhe kusht i detyrueshëm për përparimin e Shqipërisë në rrugën e anëtarësimit në Bashkimin Evropian.

Marco TARQUINIO, eurodeputet

Kryetar i Delegacionit për Marrëdhëniet me Shqipërinë

Andreas SCHIEDER, eurodeputet

Raportues i Përhershëm për Shqipërinë