Dita e 6-të e revoltës së studentëve, protestuesit ‘e djegin’ me valle

Pas pesë ditësh me tensione dhe përplasje, protesta e së dielës në Tiranë ka nisur me një atmosferë më të qetë. Pranë Ministrisë së Arsimit, në Rrugën e Durrësit, protestuesit janë mbledhur duke kënduar e kërcyer, duke i dhënë një tjetër ritëm tubimit të ditës së gjashtë.

Ndryshe nga ditët e mëparshme, kur protestat u shoqëruan me momente të tensionuara dhe përplasje, këtë herë grumbullimi i qytetarëve ka nisur me këngë dhe valle. Deri në këto momente, situata në zonë paraqitet e qetë, ndërsa forcat e Policisë janë të pranishme dhe po monitorojnë zhvillimet.

Ndërkohë, në bulevardin përpara Kryeministrisë, ku pritet të zhvendoset protesta gjatë pasdites, kanë nisur përgatitjet për menaxhimin e tubimit. Në orët e mëngjesit, fadromat kanë ndërhyrë në trotuaret e zonës për të hequr gurët, në kuadër të masave për të shmangur incidente të mundshme.

Pas pesë ditësh të shoqëruara me përplasje dhe tensione, mbetet për t’u parë nëse atmosfera e qetë me të cilën nisi tubimi do të ruhet edhe gjatë orëve të pasdites, kur protestuesit të mblidhen përpara godinës së Kryeministrisë.