Destinacionet më të nënvlerësuara turistike në Europë për 2027

Rajoni i Bukovinës në Rumani është shpallur destinacioni turistik më i nënvlerësuar në botë për vitin 2027, sipas renditjes më të fundit të revistës Time Out.

Lista përfshin 41 qytete dhe rajone nga e gjithë bota, ndërsa pesë destinacione europiane renditen mes 12 vendeve të para.

Renditja synon të promovojë destinacione më pak të njohura, që ofrojnë alternativa ndaj qyteteve të mbipopulluara nga turistët, si Venecia dhe Barcelona.

Këto vende dallohen për peizazhet natyrore, trashëgiminë kulturore dhe mundësinë për të udhëtuar larg turmave.

Bukovina, që kryeson renditjen globale, krahasohet me Transilvaninë për peizazhet malore, traditat shekullore dhe arkitekturën e veçantë, por ka shumë më pak vizitorë.

Rajoni po fiton popullaritet edhe falë shtegut turistik Via Transilvanica, me gjatësi 1,400 kilometra.

Në listë spikasin gjithashtu qytetet e rajonit Asturias në Spanjë, veçanërisht për gastronominë dhe kulturën lokale, si dhe destinacionet bregdetare të Portugalisë dhe Francës, që ofrojnë alternativa më të qeta ndaj vendpushimeve të njohura turistike.

Ishujt Azore në Portugali, të njohur si “Hawai i Europës”, renditen gjithashtu mes destinacioneve të përzgjedhura. Arkipelagu po promovon zhvillimin e qëndrueshëm të turizmit për të mbrojtur pasuritë natyrore dhe kulturore.

Renditja e destinacioneve europiane për vitin 2027 (pozicioni në botë):

1. Bukovina, Rumani – vendi i parë
2. Qytetet e Asturias, Spanjë – vendi i tretë
3. Zambujeira do Mar, Portugali – vendi i gjashtë
4. Carry-le-Rouet, Francë – vendi i nëntë
5. Ishujt Azore, Portugali – vendi i 12-të

Renditja e 10 destinacioneve më të nënvlerësuara në botë për vitin 2027, sipas Time Out:

1 Bukovina, Rumani

2 Dakota e Jugut, SHBA

3 Qytetet e Asturias, Spanjë

4 Gadishulli Osa, Kosta Rika

5 San Martín, Peru

6 Zambujeira do Mar, Portugali

7 Bisbee, Arizona, SHBA

8 Shenzhen, Kinë

9 Carry-le-Rouet, Francë

10 Tioga Pass, Kaliforni, SHBA

/ Euronews, Time Out