Katie Zacharia do të largohet nga posti i sekretares së shtypit të Shtëpisë së Bardhë, vetëm pesë ditë pas daljes së saj të parë publike, e cila u shoqërua me kritika dhe pikëpyetje mbi përgatitjen e saj profesionale. Presidenti amerikan Donald Trump kishte lënë të kuptohej për largimin e saj disa orë përpara njoftimit, duke thënë se e kishte këshilluar të rishqyrtonte vendimin për të qëndruar në këtë detyrë. Ai kritikoi gjithashtu mënyrën se si mediat e kishin trajtuar Zacharian.
Konferenca e saj e parë për shtyp, të martën, zgjati më pak se 15 minuta dhe përfshiu vetëm tri pyetje nga gazetarët. Gjatë saj, Zacharia u duk nervoze dhe lexoi pikat kryesore nga shënimet e saj. Debati u përqendrua kryesisht te kredencialet e saj ligjore. E diplomuar në Fakultetin e Drejtësisë në Universitetin Pepperdine, Zacharia ishte prezantuar si avokate, por të enjten pranoi se nuk e kishte kaluar provimin e jurisprudencës në SHBA.
Në një deklaratë, ajo sqaroi se kishte punuar në fushën e transaksioneve ndërkombëtare në Kinë, duke pretenduar se zotëronte kredencialet e nevojshme për këtë veprimtari. Çështja u diskutua gjerësisht në media, përfshirë Fox News, ku komentatori Sean Hannity e pyeti pse nuk kishte sqaruar më herët se nuk kishte ushtruar profesionin e avokates. Zacharia u mbrojt duke thënë se ishte punësuar për një rol në komunikim, jo për një pozicion ligjor.
Të premten, gjatë një interviste në emisionin “Fox & Friends”, ajo u pyet nëse e kishte ende besimin e presidentit. Zacharia nuk dha një përgjigje të drejtpërdrejtë, por u shpreh se shpresonte të fitonte besimin e tij dhe të stafit. Pas njoftimit për largimin, ajo vlerësoi Trump-in në rrjetin social X, duke e cilësuar si një president të sjellshëm, të dhembshur dhe punëtor, si dhe duke e përshkruar si nder bashkëpunimin me të.
Largimi i Zacharias është ndër më të shpejtët në ekipin e komunikimit të Shtëpisë së Bardhë gjatë presidencës së Trumpit. Në mandatin e tij të parë, Anthony Scaramucci qëndroi vetëm 10 ditë në postin e drejtorit të komunikimit. Ndërkohë, demokratët kanë përdorur largimin e saj për të kritikuar administratën republikane, në një periudhë kur po afrohen zgjedhjet e mesit të mandatit, që do të përcaktojnë kontrollin e Kongresit amerikan.
