Fenomeni klimatik, El Nino, pritet të jetë më i forti dhe të vazhdojë deri në fillim të vitit 2027.
Pikërisht për këtë temë u diskutua dhe në emisionin e sotëm “Rudina”, në TV Klan, ku i ftuari ishte dhe Petrit Zorba, Profesor në Akademinë e Shkencave të Shqipërisë.
Ai shpjegoi fillimisht origjinën e emërtimeve El Nino dhe La Nina dhe lidhjen e tyre me periudhën e Krishtlindjeve.
“Vijnë nga fjalët spanjisht, nino i vogli dhe nina e vogla, që në fakt si emërtime vijnë nga 200 vite më përpara nga peshkatarët peruanë që e lidhin me Krishtlindjet, kur në këtë periudhë mendohej që fëmija i vogël i Krishtit, e të tjera, e të tjera. Pasi në këtë periudhë kohore shfaqet më shumë dukuria e El Ninos. Në muajin dhjetor është piku. Edhe këtë vit piku do jetë në dhjetor, pastaj fundi i saj parashikohet në shkurt”, tha ai.
Profesori shpjegoi gjithashtu zonën ku shfaqet fenomeni El Nino dhe mënyrën se si qarkullojnë erërat dhe ujërat e ngrohta në zonën ekuatoriale.
“Dukuria ka lidhje me zonën ekuatoriale nga Indonezia deri në pjesën veriperëndimore të Amerikës së Jugut. Pra, nga Indonezia deri në Peru, Panama, Ekuator. Në këtë pjesë të ekuatorit, gjatë gjithë vitit, në gjithë vitet, fryjnë erëra që vijnë nga zona tropikale në veri të ekuatorit, 23-30 gradë dhe po ashtu dhe nga jugu, në drejtim të ekuatorit, të cilat i shtyjnë ujërat e ngrohta në drejtim të perëndimit. Pra, normalisht, çdo vit pranë zonës së Indonezisë kemi reshje intensive si pasojë që në këtë zonë masat ajrore ngrihen në lartësi dhe sjellin reshje”, u shpreh ai.
Zorba sqaroi dhe ndryshimin që ndodh gjatë fenomenit El Nino, kur ujërat e ngrohta zhvendosen drejt brigjeve të Amerikës së Jugut.
“Mirëpo problemi është këtu, që në rastin e El Ninos, këto ujëra të ngrohta që grumbullohen përgjithësisht në pjesën perëndimore të Paqësorit, nuk zhvendosen në këtë formë, por kthehen mbrapsht dhe grumbullohen pranë Perusë dhe Ekuadorit”, tha ai.
Sipas tij, nuk janë vetëm rrymat ujore ato që ndikojnë, por edhe masat ajrore mbi to, të cilat zhvendosen dhe ndikojnë në zona të ndryshme të Amerikës.
“Problemi nuk është tek rrymat ujore, tek masat ujore, por përmasat ajrore që janë mbi to, të cilat nuk qëndrojnë mbi këto masa dhe zhvendosen dhe prekin zona të ndryshme. Këto masa që kanë thithur shumë lagështi nga oqeani dhe kanë temperatura të larta, ndikojnë në klimën qoftë në Amerikën e Jugut, qoftë në Amerikën e Veriut”, sqaroi profesori.
Në fund, Zorba e cilëson El Nino-n si një nga elementet kryesore që ndikon në formimin e klimës në Tokë, ndërsa thekson se fenomeni nuk lidhet me ndryshimet klimatike apo ngrohjen globale.
“El Nino konsiderohet i një dirigjenti, si një nga elementet kryesore të formimit të klimës në Tokë. Nuk ka lidhje me ndryshimet klimatike, as me ngrohjen globale. Kjo është thënë nga të gjitha organizatat”, tha ai.
