Gjiganti kinez i teknologjisë “Huawei” lançoi të hënën telefonin inteligjent Mate XT 2 me palosje të trefishtë, me çipin e ri Kirin 9050 Pro, procesori i parë me performancë të lartë që përdor teknologjinë e palosjes logjike, shkruan “Xinhua”.
Ai i shtresëzon njësitë logjike në një çip të vetëm, duke shkurtuar kohën për transmetimin e sinjalit dhe duke rritur performancën e përgjithshme, u bë e ditur në eventin e lançimit në Guangzhou.
Herën e fundit që “Huawei” prezantoi një çip të ri Kirin në një lançim kryesor ishte në evetin global të telefonit inteligjent Mate 40 gjashtë vjet më parë.
Shpenzimet e kompanisë për kërkim dhe zhvillim (R&D) u përshpejtuan ndjeshëm duke arritur në 121.38 miliardë juanë (17.9 miliardë dollarë amerikanë) në gjysmën e parë të vitit 2026, duke shënuar një rekord të lartë për periudhën dhe duke përbërë më shumë se një të katërtën e të ardhurave.
“Huawei” po përparon me shpejtësi në fusha të shumta me intensitet të lartë teknologjik, duke përfshirë inteligjencën artificiale, çipat, sistemet operative dhe automjetet inteligjente, me intensitetin e saj të qëndrueshëm të kërkim-zhvillimit që hedh themelet për aftësi teknologjike afatgjatë.
Strategjia duket se po jep fryte në treg. Sipas të dhënave të IDC-së, dërgesat e telefonave inteligjentë të “Huawei” u rritën me 19.4 për qind në baza vjetore në tremujorin e dytë të vitit, duke e çuar hapësirën e tregut në 22.6 për qind, pozicioni kryesor në Kinë.
