Banorët e fshatrave të zonës naftëmbajtëse Patos-Marinzë janë ngritur sërish paraditen e kësaj të marte në protestë për mospagesën e qirasë së tokave nga kompania “Bankers Petroleum”.
Pas dy protestave të mëparshme pranë zyrave qëndrore në Fier, protesta e sotme është zhvendosur pranë zyrave në vendburim. Ata kanë kërkuar njëzëri që kontratat të mos ndryshojnë duke u ulur vlerën e pagesës, pasi në të kundërt do të përshkallëzojnë protestën e tyre.
Ata pohojnë gjithashtu se protestat e deritanishme nuk kanë sjellë asnjë negociatë dhe shprehen të vendosur për t’i qëndruar deri në fund kauzës së tyre.
Sipas tyre, nëse nuk respektojnë marrëveshjen do të kërkojnë rikthimin e tokave në gjendje fillestare.
“Erdhi drejtori gjeologjik, filloi të na justifikohej me shpenzimet e kompanisë. Ne nuk pranuam. I thamë do të kalojmë në sheshe. Ne siç jemi do të bllokojmë sheshin kryesor, dhe më pas secili në tokat e tij”, tha një banor.
