Rrugët që do të bllokohet dhe çfarë duhet të dinë tifozët

Policia e Shtetit ka vendosur në zbatim një plan të posaçëm masash për garantimin e rendit dhe sigurisë para, gjatë dhe pas ndeshjes së futbollit mes Shqipërisë dhe San Marinos, e cila do të zhvillohet sot në stadiumin “Air Albania”, në orën 20:45.

Për mbarëvajtjen e aktivitetit sportiv dhe menaxhimin e fluksit të tifozëve, në terren do të angazhohen qindra punonjës policie. Masat janë hartuar duke u bazuar edhe në eksperiencën e strukturave të rendit gjatë organizimit të aktiviteteve të mëdha sportive dhe ndërkombëtare.

Një pjesë e rëndësishme e planit lidhet me qarkullimin rrugor. Policia e Shtetit, në bashkëpunim me Policinë Bashkiake të Tiranës, do të kufizojë lëvizjen e automjeteve në disa rrugë pranë stadiumit, duke nisur nga ora 17:00 dhe deri në përfundimin e ndeshjes.

Këto janë rrugët ku do të ketë kufizime

Gjatë kësaj periudhe, qarkullimi do të bllokohet ose devijohet në këto akse:

• Bulevardi “Dëshmorët e Kombit”, nga zona pranë fast food-it “Laguna”, në afërsi të urës së ish-Hotel Dajtit;
• Rruga “Papa Gjon Pali II”, te kryqëzimi me RTSH-në;
• Rruga “Dervish Hima”, pranë Ambasadës së SHBA-së;
• Rruga “Asim Zeneli”, pranë Ambasadës së SHBA-së;
• Rruga “Themistokli Gërmenji”, në hyrje;
• Rruga “Ismail Qemali”, te kryqëzimi i RTSH-së;
• Rruga “Lekë Dukagjini”, pranë ish-Gardës së Republikës, e cila do të shërbejë si korridor hyrës për parkimin e përcaktuar vetëm për automjetet e autorizuara nga FSHF-ja;
• Rruga “Abdyl Frashëri”, pranë kryqëzimit të Librit Universitar;
• Sheshi “Willson”, ku lëvizja do të devijohet në drejtim të rrugës “Sami Frashëri” pak përpara përfundimit të takimit.

Ndërkohë, Rruga e Elbasanit, Unaza dhe bulevardi “Bajram Curri” do të mbeten të hapura për qarkullimin e automjeteve.

Kontrolle të rrepta në hyrje të stadiumit

Përveç masave në rrugë, policia do të kryejë kontrolle të detajuara ndaj tifozëve përpara hyrjes në stadium. Synimi është të parandalohet futja e sendeve apo materialeve që mund të rrezikojnë sigurinë e personave të pranishëm.

Në listën e sendeve që nuk do të lejohen në stadium përfshihen banderolat me përmbajtje raciste, fishekzjarrët, flakadanët dhe lëndët e tjera piroteknike, si dhe monedhat metalike, çadrat, çakmakët, karikuesit e celularëve, produkte apo mjete kozmetike dhe sende të tjera të forta ose potencialisht të rrezikshme.

Policia u ka bërë thirrje tifozëve që të mos e lënë hyrjen në stadium për minutat e fundit. Për shkak të fluksit të pritshëm, dyert do të jenë të aksesueshme duke nisur nga ora 18:30, ndërsa mbërritja me vonesë mund të sjellë pritje të gjata dhe rrezik për humbjen e fillimit të ndeshjes.

Strukturat e Policisë së Shtetit do të jenë të shpërndara në pika të ndryshme të Tiranës për të garantuar sigurinë, orientuar tifozët dhe ndërhyrë në rast nevoje.

Masat synojnë që përballja Shqipëri–San Marino të zhvillohet pa incidente, ndërsa autoritetet u kanë kërkuar tifozëve të respektojnë udhëzimet e policisë dhe kufizimet e përkohshme të qarkullimit.