Kualifikimet profesionale të Katie Zacharia-s, e emëruar nga Donald Trump si zëdhënëse e re e Shtëpisë së Bardhë, janë vënë në pikëpyetje pas një raportimi të The Wall Street Journal, sipas të cilit ajo nuk ka arritur të kalojë provimin e avokatisë në Kaliforni. Çështja ka marrë vëmendje pasi presidenti amerikan e prezantoi atë si avokate në njoftimin për emërimin e saj, shkruan The Wrap.
Sipas raportimit, që citon një burim të njohur me çështjen, Zacharia iu nënshtrua provimit të jurisprudencës në Kaliforni pas diplomimit në fakultetin juridik të Universitetit Pepperdine në vitin 2011, por nuk e kaloi atë. Ky provim është një nga kushtet për marrjen e licencës zyrtare për ushtrimin e profesionit të avokatit. Megjithatë, ajo raportohet se ka kaluar provimin Multistate Professional Responsibility Examination, i cili vlerëson njohuritë mbi përgjegjësinë profesionale dhe etikën në fushën juridike.
Debati nisi që në ditën e parë të saj në detyrë, kur Zacharia, gjatë një komunikimi me gazetarët, deklaroi se e kishte kaluar provimin e avokatisë “kur u transferova në Kinë”. Më pas, ajo iu përgjigj mediave me një deklaratë tjetër:
“Kam ushtruar të drejtën ndërkombëtare të transaksioneve, me të gjitha kualifikimet përkatëse.”
Sipas The Wall Street Journal, Zacharia e dha provimin në periudhën kur po përgatitej për martesën me bashkëshortin e saj aktual, Tyler Zacharia, si dhe për zhvendosjen në Kinë. Një burim i cituar nga TheWrap bëri të ditur se ajo u transferua atje pas diplomimit, për shkak të punës së bashkëshortit në një firmë amerikane të investimeve private.
Më vonë, Zacharia raportohet se punoi si bashkëpunëtore në firmën ligjore Zhong Lun, në ekipin e praktikës ndërkombëtare. Sipas raportimit, diploma juridike dhe përvoja e saj në transaksionet ndërkombëtare i mundësonin të ofronte analiza ligjore, pavarësisht çështjes së licencimit.
Zëdhënësi i Shtëpisë së Bardhë, Steven Cheung, reagoi për TheWrap të mërkurën në mbrëmje, duke vlerësuar aftësitë e saj.
“Katie është një shtesë e shkëlqyer dhe e mrekullueshme për ekipin. Ajo është e kualifikuar në mënyrë unike dhe jashtëzakonisht e zgjuar për të informuar popullin amerikan mbi të gjitha gjërat e mira që presidenti Trump dhe administrata e tij kanë bërë, dhe do të bëjë një punë të shkëlqyer si zëdhënëse e shtypit”, deklaroi Cheung.
Ndërkohë, një zyrtar i Shtëpisë së Bardhë i tha The Wall Street Journal se Zacharia nuk ishte punësuar për të trajtuar çështje ligjore në emër të Trump.
Pavarësisht kësaj, ajo e ka prezantuar veten si avokate edhe gjatë angazhimit të saj si komentatore konservatore. Në një dalje në Fox News më 31 gusht, teksa diskutonte procesin gjyqësor ndaj personit të dyshuar për vrasjen e Charlie Kirk, ajo deklaroi: “Si avokate, hapat proceduralë janë absolutisht thelbësorë për t’u siguruar që gjithçka të bëhet siç duhet.”
Edhe Fox News e identifikoi atë në ekran si strategjiste ligjore dhe politike, si dhe avokate. Një përfaqësues i rrjetit televiziv nuk iu përgjigj menjëherë kërkesës së TheWrap për koment.
Të premten, Trump konfirmoi se Zacharia do të zëvendësojë Karoline Leavitt në postin e zëdhënëses së Shtëpisë së Bardhë. Në njoftimin e tij, presidenti e përshkroi atë si “avokate” dhe vlerësoi formimin e saj akademik në Universitetin Pepperdine dhe në fakultetin juridik Pepperdine Caruso.
“Është një nder i madh për mua që sapo emërova Katie Zacharia-n si zëdhënëse të shtypit. Katie aktualisht shërben si këshilltare e lartë për komunikimin në Truth Social (Trump Media & Technology Group), ku ka qenë e shkëlqyer!”, shkroi Trump.
Ai përmendi gjithashtu përvojën e saj të mëparshme si zëdhënëse dhe zëvendësndihmëse e sekretarit për çështjet publike në Departamentin e Sigurisë Kombëtare, si dhe angazhimin në fushatat e tij elektorale.
Trump u shpreh i bindur se Zacharia do të japë rezultate të forta në detyrën e re dhe se do të bashkëpunojë mirë me median, qytetarët amerikanë dhe administratën e tij. Në të njëjtin njoftim, ai vlerësoi edhe punën e paraardhëses së saj, Karoline Leavitt.
Raportimi mbi provimin e avokatisë ka ngritur pikëpyetje mbi mënyrën se si janë përshkruar kualifikimet profesionale të zëdhënëses së re, ndërsa Shtëpia e Bardhë ka theksuar se detyra e saj nuk lidhet me trajtimin e çështjeve ligjore të presidentit.
