Hetimi i administratës Trump ndaj kongresmenes Ilhan Omar synon të krijojë bazën ligjore për t’i hequr shtetësinë amerikane dhe, në fund, për ta deportuar, sipas zyrtarëve amerikanë dhe personave të tjerë të njohur me hetimin.
Hetimi, i cili po zhvillohet në disa drejtime, përqendrohet të paktën pjesërisht te mënyra se si Omar e fitoi shtetësinë pasi mbërriti në SHBA nga Somalia disa dekada më parë. Sipas disa personave të njohur me hetimin, autoritetet po shqyrtojnë si veprimet e kongresmenes, ashtu edhe ato të babait të saj të ndjerë. Nur Omar Mohamed e solli vajzën dhe anëtarët e tjerë të familjes në SHBA nga një kamp refugjatësh në Kenia në vitin 1995.
Banesa e Omarit në Uashington, D.C., u kontrollua nga agjentë federalë herët të hënën, tre javë përpara zgjedhjeve të mesmandatit, në të cilat ajo po kërkon rizgjedhjen. Departamenti i Drejtësisë deklaroi se agjentët e Departamentit të Sigurisë Kombëtare kryen një kontroll të autorizuar nga gjykata, por nuk pranoi të jepte më shumë hollësi.
Sipas disa personave, sendet e sekuestruara nga banesa e Omarit përfshijnë telefonin celular, blloqet e shënimeve, kompjuterët personalë dhe pasaportën e saj. Në momentin e kontrollit, në shtëpi ndodheshin vetëm kongresmenja dhe bashkëshorti i saj.
Autoritetet kanë lëshuar gjithashtu më shumë se një duzinë urdhërthirrjesh, përfshirë ndaj disa të afërmve të Omarit, duke kërkuar dëshminë e tyre përpara një jurie të madhe hetimore në Minesota, tha një person i njohur me procedurat. Sipas tij, ndër të tjera, hetimi po shqyrton dokumentacionin e emigracionit të familjes së saj.
Në një intervistë të dhënë për The Wall Street Journal në fillim të këtij viti, Omar deklaroi se nuk kishte kryer kurrë mashtrim lidhur me emigracionin.
“Presidenti Trump do të donte të eliminonte një nga zërat progresistë më efektivë në Kongres. Nuk ka asnjë bazë për këtë”, thuhej në një deklaratë të zyrës së saj të mërkurën.
Administrata Trump ka ndërmarrë një përpjekje të paprecedentë për t’u hequr shtetësinë qytetarëve amerikanë të natyralizuar, duke pretenduar se ata kanë gënjyer gjatë procesit të marrjes së shtetësisë dhe duke ngritur dhjetëra padi. Nëse çështja e Omarit vazhdon, ajo mund të bëhet rasti më i profilizuar publikisht dhe njëkohësisht më i debatueshëm i kësaj fushate. Presidenti ka kërkuar prej kohësh deportimin e saj, duke e përdorur si pikë referimi për krahët kundër emigracionit dhe kundër myslimanëve brenda Partisë Republikane.
Të hënën në mbrëmje, një turmë në Ohajo, ku Trump po mbante një fjalim, brohoriti “Deportojeni!” pasi ai foli për Omarin dhe somalezët e tjerë.
“Ata mashtrojnë për gjithçka”, tha ai. “Ne nuk do ta tolerojmë këtë.”
Omar, 44 vjeçe, ka qenë prej kohësh një nga objektivat kryesore të hetimeve të drejtuara nga republikanët. Një skandal për mashtrime me fondet e ndihmës sociale në Minesota, ku një pjesë e madhe e të pandehurve janë me origjinë somaleze, i ka shtuar intensitetin kësaj çështjeje.
Në qendër të hetimit për emigracionin qëndron çështja nëse Omar ose babai i saj e ndryshuan moshën e saj në aplikimin për shtetësi, duke e paraqitur si 17-vjeçare në vend të 18-vjeçares, sipas personave të njohur me hetimin.
Nëse Omar ishte 17 vjeçe në kohën kur babai i saj aplikoi për shtetësi, ajo do të kualifikohej automatikisht, pa pasur nevojë të ndiqte një proces të veçantë emigracioni. Ajo e mori shtetësinë amerikane në vitin 2000.
Sipas personave të njohur me këto përpjekje, zyrtarët e Njësisë së Hetimeve për Sigurinë Kombëtare shqyrtuan një informacion të ngjashëm gjatë administratës Biden, por vendosën të mos e çonin më tej çështjen, pasi nuk kishin prova për mashtrim.
Qeveria nuk mund t’ia heqë thjesht shtetësinë amerikane një personi. Departamenti i Drejtësisë duhet të ngrejë një padi në gjykatën federale dhe të provojë se personi ka gënjyer për një çështje thelbësore për të fituar shtetësinë. Shumica e çështjeve të ngritura nga Departamenti i Drejtësisë gjatë mandatit aktual ende nuk kanë marrë një vendim gjyqësor.
Leon Fresco, një zyrtar i lartë për çështjet e emigracionit në Departamentin e Drejtësisë gjatë administratës Obama, tha se çështja e administratës Trump do të varej nga gjetja e provave thelbësore se Omar kishte gënjyer për moshën e saj, dhe jo thjesht se babai i saj kishte dhënë informacion të rremë në emër të saj.
“Kjo do ta bënte çështjen dukshëm më të lehtë për t’u ndjekur penalisht”, tha ai. “Por, sido që të jetë, ata nuk po ndjekin një rrugë të shtruar dhe të lehtë.”
Zyrtarët e administratës kanë promovuar atë që e përshkruajnë si përpjekjen më të gjerë në historinë e Departamentit të Drejtësisë për t’u hequr shtetësinë personave të natyralizuar. Në total, administrata ka ngritur më shumë se 200 padi kundër personave të dënuar për vepra penale dhe të tjerëve, të cilëve synon t’u heqë shtetësinë.
Përpara se Trump të merrte detyrën për mandatin aktual, çështjet për heqjen e shtetësisë ishin të rralla. Sipas Transactional Records Access Clearinghouse, një organizatë jofitimprurëse që monitoron të dhënat federale për emigracionin, qeveria ngrinte rreth një duzinë ose më pak çështjesh të tilla në vit.
Jeanine Pirro, prokurorja federale e SHBA-së në Uashington, tha se zyra e saj po hetonte gjithashtu deklarimet financiare të Omarit.
“Ka disa hetime që po zhvillohen”, tha Pirro të martën në Fox News. “Nëse është kryer një vepër penale, ajo do të ndiqet penalisht.”
Pirro tha se nuk kishte rëndësi fakti që, në fillim të këtij viti, një organ i pavarur dhe jopartiak, i ngarkuar me shqyrtimin e pretendimeve për shkelje nga anëtarët e Kongresit, e kishte nxjerrë Omarin të pafajshme për shkelje në lidhje me dokumentet e paraqitura në Kongres, të cilat e paraqisnin pasurinë e saj në vlera shumë më të larta se ato reale.
Omar lindi në Mogadishu të Somalisë, në vitin 1982, në një familje të pasur. Fillimisht, ajo u vendos në periferi të Uashingtonit, D.C., përpara se familja e saj të zhvendosej në Minesota, kur ajo po hynte në shkollën e mesme.
Sipas librit të saj, This Is What America Looks Like: My Journey From Refugee to Congresswoman (“Kështu duket Amerika: Udhëtimi im nga refugjate në kongresmene”), ajo humbi nënën kur ishte ende në moshën parashkollore. Ajo e përshkruan veten si fëmijën më të vogël të llastuar dhe u rrit nga babai i saj dhe disa anëtarë të familjes.
Babai i Omarit vdiq në qershor të vitit 2020, në moshën 67-vjeçare, nga komplikacione të shkaktuara nga COVID-19, sipas asaj që ka deklaruar vetë ajo. Në SHBA, ai punoi si taksist dhe punonjës i shërbimit postar.
Pretendimet për mashtrim lidhur me emigracionin e kanë shoqëruar Omarin që kur ajo kandidoi për herë të parë për një post publik në vitin 2016, kur fitoi një vend në Dhomën e Përfaqësuesve të Minesotës. Këto dyshime janë lidhur shpesh me martesat e saj të shumta.
Sekretari i Sigurisë Kombëtare, Markwayne Mullin, i tha muajin e kaluar një podkasteri konservator se ndaj Omarit po zhvillohej një hetim federal. Ai pretendoi se ajo “u martua me vëllain e saj për ta sjellë atë në Shtetet e Bashkuara”. Ky është një pretendim që Trump e ka përsëritur vazhdimisht. Omar i ka mohuar këto akuza prej më shumë se një dekade.
VINI RE: Ky material është pronësi intelektuale e WSJ
