Netflix po shkurton rreth 1.000 vende pune, në shkurtimin më të madh të personelit në katër vitet e fundit, ndërsa kompania e transmetimit përmes internetit përballet me rënien e çmimit të aksioneve dhe presionin në rritje për të shtuar angazhimin e përdoruesve në platformën e saj.
Shkurtimet, që përbëjnë rreth 6 për qind të fuqisë punëtore globale të kompanisë, do të prekin kryesisht punonjësit në sektorët e produkteve, teknologjisë, ligjor dhe burimeve njerëzore, shkruan FT.
Në një memorandum të brendshëm të siguruar nga Financial Times, bashkëdrejtuesit ekzekutivë të Netflix-it, Ted Sarandos dhe Greg Peters, u thanë punonjësve se kompania duhej të vepronte me më shumë “disiplinë”.
“Misioni ynë — të argëtojmë botën — është ambicioz dhe përmbushja e tij kërkon disiplinë në përcaktimin e përparësive për njerëzit dhe burimet tona”, shkruan ata.
Shkurtimet vijnë në një kohë kur Netflix përballet me pyetje gjithnjë e më të shumta nëse mund ta ruajë ritmin e shpejtë të rritjes. Aksionet e kompanisë kanë rënë me më shumë se 40 për qind gjatë vitit të fundit, ndërsa investitorët shqetësohen për ngadalësimin e angazhimit të përdoruesve. Përpjekja e dështuar për të blerë Warner Bros Discovery ngriti shqetësime se Netflix nuk kishte mjaftueshëm përmbajtje të fortë origjinale, shkruan FT.
Sarandos i pranoi sfidat gjatë një konference të Bloomberg muajin e kaluar.
“Në përgjithësi, nuk po rritemi aq shpejt sa dëshiroj unë dhe po punojmë për ta përshpejtuar këtë ritëm”, tha ai.
Netflix po eksperimenton me formate të reja programacioni për t’i nxitur abonentët të kalojnë më shumë kohë në platformë. Kompania po zgjeron ofertën me sporte të transmetuara drejtpërdrejt, podkaste me video dhe programe me krijues përmbajtjesh nga YouTube.
Investitorët janë shprehur të pakënaqur me ofertën e filmave dhe serialeve televizive të kompanisë, megjithëse Netflix arrin rregullisht të ketë disa programe ndër titujt më të ndjekur në platformat e transmetimit, sipas Nielsen. Në vitin 2026, kompania nuk ka arritur të prodhojë një sukses që të ketë depërtuar te publiku në të njëjtën mënyrë si Stranger Things, Squid Game apo Wednesday në vitet e fundit.
Pavarësisht shpenzimeve të mëdha për të tërhequr regjisorë dhe aktorë të njohur, modeli i Netflix-it për publikimin e filmave drejtpërdrejt në platformë ka bërë shpesh që prodhimet e tij të mos shndërrohen në ngjarje kulturore që tërheqin abonentë të rinj.
Suksesi i kinemave të Hollivudit këtë verë, kur filmat Spider-Man: Brand New Day dhe The Odyssey arkëtuan secili më shumë se 1 miliard dollarë në mbarë botën, nënvizoi fuqinë e vazhdueshme të ekranit të madh dhe aftësinë e tij për të tërhequr vëmendjen e publikut.
Netflix ka nisur të ndryshojë modelin e shpërndarjes, duke vënë bast se shfaqjet në kinema mund ta ndihmojnë platformën të pozicionohet si një destinacion për filmat e mëdhenj me potencial komercial.
Kompania planifikon ta publikojë filmin Narnia të Greta Gerwig në kinematë e mbarë botës në vitin 2027, duke u shkëputur nga modeli i saj i kahershëm i publikimit të filmave drejtpërdrejt në platformën e transmetimit.
Shkurtimet e vendeve të punës vijnë një javë përpara se Netflix të publikojë rezultatet financiare tremujore. Sarandos dhe Peters u thanë punonjësve se kompania ishte ende në rrugën e duhur për të përmbushur parashikimin financiar për të gjithë vitin.
Hera e fundit që Netflix njoftoi shkurtime të konsiderueshme të vendeve të punës ishte në vitin 2022, pasi raportoi rënien e parë tremujore të numrit të abonentëve në më shumë se një dekadë. Ky zhvillim shkaktoi tronditje dhe çoi në një rivlerësim të gjerë të strategjisë së biznesit të kompanisë, si dhe të modelit të transmetimit në të gjithë Hollivudin.
Brian White, analist në MCH, tha se Netflix po “i afrohej fundit të një viti zhgënjyes”, duke iu referuar rritjes dhe intensifikimit të “angazhimit të përdoruesve të nxitur nga videot në platformat kryesore të rrjeteve sociale”.
“Konsumatorët kanë gjithnjë e më shumë shërbime që konkurrojnë për kohën e tyre”, shtoi ai.
