Thyerja e bankomateve gjatë protestave, ndalohet një 15-vjeçar në Tiranë

Policia e Tiranës ka publikuar një video dhe një njoftim lidhur me incidentet e regjistruara në kryeqytet gjatë protestave të ditëve të fundit. Sipas policisë, është identifikuar dhe ndaluar një 15-vjeçar, i dyshuar si një nga autorët e thyerjes së një bankomati në rrugën “Luigj Gurakuqi”.

Njoftimi i policisë

“Në vijim të veprimeve intensive hetimore dhe operacionale, të kryera me qëllim identifikimin dhe nxjerrjen përpara përgjegjësisë penale të autorëve të veprimeve të kundërligjshme gjatë protestave të ditëve të fundit, specialistët e Sektorit për Hetimin e Krimeve të Rënda kundër Pronës ndaluan një 15-vjeçar.

I mituri dyshohet se është njëri nga autorët e thyerjes së një bankomati në rrugën ‘Luigj Gurakuqi’, më datë 15.10.2026.

Punohet për identifikimin dhe ndalimin e shtetasve të tjerë të përfshirë në këtë rast.

Materialet procedurale iu referuan Prokurorisë, për veprime të mëtejshme”, thuhet në njoftim.