Reperi amerikan Sean “Diddy” Combs është transferuar papritur nga burgu federal FCI Fort Dix, në New Jersey, drejt një institucioni tjetër në Pensilvani. Lëvizja ka ngritur pikëpyetje për arsyet e vendimit, ndërsa autoritetet amerikane nuk kanë dhënë ende një shpjegim zyrtar.
Sipas mediave amerikane, përfshirë TMZ, transferimi u krye të premten, më 16 tetor. Byroja Federale e Burgjeve ka konfirmuar se Combs është dërguar në FCI Allenwood Low, por nuk ka sqaruar pse u vendos ndryshimi i institucionit ku ai vuan dënimin.
Një nga pistat që po diskutohet lidhet me sigurinë personale të reperit. Burgu i ri ka një nivel të ngjashëm sigurie me atë të mëparshëm, por strehon më pak të burgosur, çka mund t’u mundësojë autoriteteve ta monitorojnë më nga afër. Megjithatë, deri tani nuk ka konfirmim se transferimi është kryer për shkak të ndonjë kërcënimi ndaj tij.
Lëvizja vjen në një periudhë kur Combs është përfshirë në raportime për shkelje të pretenduara gjatë qëndrimit në burg. Sipas TMZ, reperi është ndëshkuar për çështje që lidhen me përdorimin e telefonave të palejuar dhe konflikte, ndërsa raportohet se është dërguar dy herë në një njësi të posaçme izolimi.
Në vëmendje është rikthyer edhe gjendja e tij shëndetësore. Mediat amerikane kanë raportuar se ai kishte marrë trajtim mjekësor pas një dëmtimi në kokë. Megjithatë, pretendimet se dëmtimi mund të ketë ardhur nga një përleshje nuk janë konfirmuar, ndërsa autoritetet e burgjeve kanë mohuar se kishte ndodhur incidenti i raportuar.
Sipas TMZ, Combs ka humbur gjithashtu 41 ditë nga krediti për sjellje të mirë, i cili mund të ndikojë në kohëzgjatjen e qëndrimit të tij në burg. Raportimet përmendin edhe kufizime të vendosura ndaj tij për blerjet në dyqanin e institucionit penitenciar.
Sean Combs po vuan një dënim prej 50 muajsh burg, pasi u shpall fajtor për dy akuza që lidhen me transportimin e personave për qëllime prostitucioni. Ai u shpall i pafajshëm për akuzat më të rënda të trafikimit seksual dhe komplotit kriminal.
Pavarësisht raportimeve dhe spekulimeve, autoritetet nuk kanë bërë të ditur arsyen konkrete të transferimit, ndaj lidhja e këtij vendimi me sigurinë e reperit mbetet e pakonfirmuar.