Botuesi i Koha Jonë, Nikoll Lesi, i ftuar në emisionin “Të Paekspozuarit” në Vizion Plus te Ylli Rakipi, deklaroi se protestuesit duhet të krijojnë parti politike dhe ta mundin pushtetin me votë. Ai tha se në shumë kërkesa protestuesit kanë të drejtë, por nuk mund ta shembin sistemin jashtë procesit zgjedhor.
“Kjo protestë që filloi me flamingot dhe vazhdoi e dhunshme, ndryshon nga kjo e Italisë, Francës, Belgjikës, pasi atje kanë kërkesa ekonomike, kurse këtu në Shqipëri kanë kërkesa politike. Duan sistem të ri politik, largimin e Ramës dhe Berishës. Por sipas meje, i kam pyetur protestuesit në Koha Jonë Debat, pse nuk krijoni parti dhe të futeni në sistemin politik. Kam bindje se do marrin shumë vota, duke krijuar premisa për ndryshimin e sistemit politik. Kam informacione nga të dyja kampet politike, PS dhe PD, se ata i frikësohen pikërisht faktit se studentët dhe rinia mund të krijojnë Lëvizje Politike dhe të futen në zgjedhje. Se kjo Lëvizje e re merr shumë vota, por duhe të vendosin personalitete publike si kandidat për deputet që t’i përfaqësojnë në parlament dhe jo si disa kalamaj që ka PS apo PD, sot si deputetë që nuk dinë as të flasin. Apo që kur flasin marrin leje nga partia. Deputeti duhet të ketë personalitet e integritet. Nëse e bëjnë këtë gjë, mendoj, se do të hyjnë në histori si njerëz që ndryshuan sistemin politik tradicional. Por e përsëris duke djegur me zjarr e duke shkatërruar gjithçka u del përpara, e kanë gabim dhe kthehet në faj të dënueshëm ligjor.
Sipas meje, në protestë tani ka konglomerat, ku futen studentë vizionar, guximtar, të rinjë që duan ndryshim, ka edhe pjestarë të bandave kriminale që djegin me zjarr, sikurse janë qytetarë të varfër, por të drejtë, realisht kanë të drejtë në shumicën e gjërave, kanë kushte dhe jetese të vështirë. Nuk shikojnë garanci për të ardhmen e tyre. E theksoj se nuk jam për protesta të dhunshme dhe djegie pronash private, por as edhe ato publike.
Mendoj se kryeministri Rama kishte më shumë frikë nga protesta e flamingove, ku disa herë kishte dhjetra mijëra veta, sesa nga kjo e dhunshmja protestë që po ndodh këto ditë. I kam pyetur drejtuesit e tyre, të protestës së flamingove, pse nuk rrini në shesh ditë dhe natë, derisa të vijë zgjidhja politike, duke e detyruar kryeministrin për zgjidhje politike. Të regjistrohen në fletë votimi si “Shqipëria e Re”, deklaroi Lesi.
Me tej Lesi shtoi se kryeministri, realisht siç e shikojë, nuk rrëzohet me protesta të dhunshme. BE dhe ambasada amerikane i dënuan protestat e dhunshme, hapur. Ndaj duke mbaruar për sonte, mund të them se nëse i rikthehen protestës paqësore, do të ketë shumë njerëz, edhe unë do të dal me ata, Por të jenë rezistentë në sheshin para kryeministrisë, ditë-natë. “Revolucioni” që ata kërkojnë ka nevojë për vendosmeri e qëndrim, po e përsëris, ditë-natë para kryeministrisë, pasi realisht kryeministri këtë ka frikë. Kjo e detyron të shkojë në zgjedhje, kur shoqeria ngrihet e tëra paqësisht. Ndaj mendoj, ndonëse do të fillojnë në rrjete sociale edhe sharje, se duhet përkrahur rinia e sidomos studentët, por asnjëherë me dhunë. Kështu mendoj.