Bursat globale në rënie, nafta shtrenjtohet mes pasigurisë për investimet në AI

Tregjet financiare ndërkombëtare u përballën me një tjetër valë shitjesh të martën, me bursat aziatike që regjistruan humbje të konsiderueshme, ndërsa çmimet e naftës vijuan rritjen dhe investitorët u përqendruan te rezultatet financiare të kompanive kryesore të teknologjisë.

Indeksi MSCI i aksioneve aziatike, pa përfshirë Japoninë, ra me 1.14%, ndërsa Nikkei 225 humbi 0.98%. Rënia më e fortë u regjistrua në Korenë e Jugut, ku indeksi KOSPI u tkurr me 3.92%. Presioni u shtri edhe në tregjet evropiane. Kontratat e së ardhmes për Euro Stoxx 50 ranë me 0.57%, ato për indeksin gjerman DAX me 0.33%, ndërsa kontratat për FTSE humbën 0.47%.

Në të kundërt, kontratat e së ardhmes për indeksin amerikan S&P 500 shënuan një rritje të lehtë prej 0.12%, duke arritur në 7,743.5 pikë.

Sipas Reuters, dobësimi i tregjeve lidhet me tensionet gjeopolitike, rritjen e çmimeve të energjisë dhe shqetësimet në rritje mbi përfitueshmërinë e investimeve masive në inteligjencën artificiale. Investitorët po presin rezultatet tremujore të kompanive të mëdha, përfshirë Netflix dhe SpaceX, ndërsa gjatë javës priten edhe raportimet financiare të Meta dhe Tesla. Vëmendja është zhvendosur nga rritja e të ardhurave të kompanive teknologjike te kostot e financimit dhe aftësia e tyre për të gjeneruar kthime nga investimet në inteligjencën artificiale.

Goldman Sachs parashikon se pesë prej kompanive më të mëdha që investojnë në infrastrukturën e inteligjencës artificiale mund t’i rrisin shpenzimet e përbashkëta kapitale në rreth 1.2 trilion dollarë vitin e ardhshëm. Shqetësimet u reflektuan edhe në debutimin bursier të kompanisë koreanojugore Elice Group, e specializuar në infrastrukturën e inteligjencës artificiale. Aksionet e saj ranë pothuajse 30% nën çmimin fillestar të ofertës publike, përmes së cilës kompania kishte siguruar rreth 151 milionë dollarë.

Ndërkohë, nafta amerikane u rrit në 103.85 dollarë për fuçi, ndërsa Brent arriti në 109.64 dollarë, në një treg që po vlerëson zhvillimet gjeopolitike dhe ndryshimet e mundshme në sanksionet amerikane ndaj energjisë ruse. Presidenti amerikan Donald Trump nënshkroi një urdhër ekzekutiv që parashikon lehtësimin e disa sanksioneve dhe tarifave të lidhura me Rusinë, megjithëse deklaroi se vendimi përfundimtar ende nuk ishte shpallur.

Në tregjet valutore, indeksi i dollarit amerikan ra me 0.16%, në 101.80 pikë, ndërsa euro u forcua me 0.17%, në 1.1229 dollarë. Ari regjistroi një rritje prej 0.13%, duke arritur në 4,145.25 dollarë për ons. Bitcoin u rrit me 0.22%, në 82,117 dollarë, ndërsa Ether fitoi 0.63%, duke u tregtuar rreth 2,414 dollarë.Tregjet mbeten të përqendruara te publikimi i rezultateve financiare, çmimet e energjisë dhe sinjalet e bankave qendrore mbi drejtimin e ardhshëm të normave të interesit.