Kryeministri i Shqipërisë, Edi Rama, paralajmëroi masa penale dhe administrative ndaj personave që kanë shkaktuar dëme gjatë protestave të ditëve të fundit, ndërsa tha se qeveria po shqyrton edhe mundësinë e kufizimit të rrjeteve sociale për fëmijët nën moshën 16-vjeçare.
Që nga 13 tetori, mijëra njerëz kanë protestuar fillimisht në Tiranë e pastaj edhe në qytete të tjera, nxitur nga pakënaqësitë e studentëve për kostot e arsimit, kushtet në universitete dhe mungesën e perspektivës ekonomike.
Protestat u zgjeruan shpejt, duke përfshirë qytetarë që kundërshtojnë koston e jetesës, korrupsionin dhe mënyrën e qeverisjes. Protestuesit kërkojnë dorëheqjen e Ramës dhe të qeverisë së tij.
Por, pavarësisht protestave dhe kërkesave për dorëheqje, Rama nuk dha asnjë sinjal se do të tërhiqet nga posti. Ai tha se është i gatshëm të dëgjojë edhe qytetarët që kërkojnë largimin e tij, por këmbënguli se ndryshimet politike nuk mund të imponohen përmes dhunës.
Si ftesë për dialog, të martën, ai vendosi disa fleta me mbishkrimin “DIALOG” në disa karrige para objektit të Kryeministrisë në Tiranë.
Nga studentët te pensionistët, çfarë i bashkon protestuesit në Tiranë?
Ndërsa, duke folur në Ministrinë e Arsimit, së bashku me ministren Mirela Kumbaro Furxhi dhe drejtues të shkollave të mesme të Tiranës, Rama mbrojti reagimin e policisë – që është kritikuar për përdorim të dhunës së tepruar ndaj protestuesve – dhe i cilësoi protestat si përpjekje për destabilizimin e vendit.
Ai paralajmëroi një pako masash që, përveç përgjegjësisë penale, do të përfshijë edhe detyrimin për të kompensuar dëmet materiale. Sipas tij, përgjegjësia për dëmet e shkaktuara nga të miturit duhet të përfshijë edhe prindërit.
“Po e studiojmë dhe do ta shohim nëse do të duhet ta ulim moshën për dënimin penal, siç thashë që po e bën një sërë vendesh”, tha Rama, i cili shtoi se mund të kufizohet edhe përdorimi i rrjeteve sociale për fëmijët nën 16 vjeç.
Aktualisht, sipas Kodit Penal të Shqipërisë, përgjegjësi penale për kryerjen e një krimi kanë personat që kanë mbushur 14 vjeç, ndërsa për kundërvajtje penale ata që kanë mbushur 16 vjeç.
Gjatë këtyre ditëve, në rrjete sociale kanë qarkulluar edhe informacione të pavërteta ose të pakonfirmuara kundër Qeverisë së Ramës, disa prej të cilave janë përgënjeshtruar edhe nga organizata për kontrollimin e fakteve.
Gjatë konferencës, Rama përsëriti pretendimet se pas dhunës qëndrojnë aktorë politikë dhe të huaj, pa paraqitur prova publike për këto akuza.
Të hënën, në ditën e shtatë të protestave, policia ndërhyri më herët për të shpërndarë turmat dhe për të penguar grumbullimin e protestuesve. Gjykata e Apelit në Tiranë u godit me gurë, ndërsa në mbrëmje pati përplasje pranë Ministrisë së Brendshme.
Deri të dielën, autoritetet kishin ngritur akuza penale ndaj 388 personave në lidhje me protestat. Ndërkohë, shtatë policë ishin pezulluar nga detyra në pritje të hetimeve për dyshime për përdorim të tepruar të forcës.
Bashkimi Evropian dhe Ambasada amerikane në Tiranë kanë bërë thirrje për vetëpërmbajtje, respektim të së drejtës për protestë paqësore dhe përdorim proporcional të forcës nga autoritetet.