Kryetarja e bashkisë së Lushnjes, Eriselda Sefa, është paraqitur paraditen e kësaj të marte në Prokurorinë e Posaçme, SPAK.
Ende nuk dihen arsyet e paraqitjes së saj në institucionin e drejtësisë, ndërsa kjo nuk është hera e parë që Sefa shkon në SPAK.
Kujtojmë se kryebashkiakja e Lushnjes, është përballur më herët me një kallëzim në SPAK, lidhur me procedurën e dhënies me qira të një hapësire publike në qendër të qytetit, e përdorur nga një subjekt privat për aktivitet shërbimi dhe lojëra për fëmijë.
Siç ka raportuar më herët Boldnews, një qytetar e ka kallëzuar kryebashkiaken për falsifikim dokumentesh dhe veprime që pengojnë zbulimin e së vërtetës. Pretendimet lidhen me procedurën e dhënies me qira të ambientit në rrugën “Kongresi i Lushnjës”, si dhe me mosdorëzimin e dokumentacionit të plotë të kësaj praktike pranë SPAK-ut.
Fillimisht, prokuroria kishte kërkuar mosfillimin e hetimeve, vendim që ishte lënë në fuqi edhe nga shkalla e parë e Gjykatës së Posaçme. Por, pas ankimit të kallëzuesit, Gjykata e Posaçme e Apelit urdhëroi regjistrimin e kallëzimit dhe kryerjen e hetimeve ndaj Sefës.
Sipas kallëzuesit, parregullsitë e pretenduara lidhen me dokumentacionin për dëgjesat publike dhe projektin për miratimin e dhënies me qira të pronës. Nga ana tjetër, Sefa ka deklaruar se pala që pretendon pronësinë mbi tokën nuk disponon dokumentacion që ta vërtetojë atë.
Megjithatë deri më tani, nuk ka informacion zyrtar që të konfirmojë nëse paraqitja e kësaj të marte në SPAK lidhet me këtë çështje apo me një procedim tjetër.
