Futbollisti i njohur akuzon politikanin: Më ka vjedhur ishullin tim privat

Një konflikt pronësie në Brazil ka përfshirë sulmuesin e Tottenhamit, Richarlison, dhe senatorin Flavio Bolsonaro, kandidat për president të vendit.

Futbollisti brazilian pretendon se ka humbur kontrollin mbi një pronë luksoze në Ilha Comprida, në Angra dos Reis, në bregdetin e Rio de Janeiros, ku thotë se kishte investuar rreth 10 milionë realë brazilianë.

Sipas deklaratave të Richarlisonit, prona u ble gjatë viteve 2020–2021, në bashkëpunim me ortakë të tjerë. Futbollisti pretendon se kishte marrë disa oferta për shitjen e saj, përfshirë një që ia atribuon Flavio Bolsonaros, por kishte refuzuar ta shiste.

Në një video të publikuar në rrjetet sociale më 17 tetor, sulmuesi ngriti akuza për mënyrën se si prona përfundoi në duart e palëve të tjera.

“Flavio Bolsonaro dhe Willer Tomaz shkuan atje dhe, brenda 24 orësh, morën posedimin e pronës”, deklaroi Richarlison, duke pretenduar se kishte humbur investimin pa marrë kompensim financiar.

Futbollisti kërkoi që Policia Federale të hetojë çështjen dhe të sqarojë rrethanat në të cilat prona kaloi në posedimin e palëve të tjera.