Një ushtarak amerikan humbi jetën pasi u rrëzua nga tavani i stadiumit Alamodome në San Antonio, gjatë një demonstrimi me litar, pak para fillimit të një ndeshjeje futbolli amerikan mes Universitetit të Teksasit në San Antonio dhe Akademisë Detare të SHBA-së. Viktima është identifikuar si rreshteri teknik Ian Patterson, pjesëtar i Forcave Ajrore amerikane, i cili shërbente në Detashmentin 2 të Skuadronit të 6-të të Stërvitjes Luftarake. Ai kishte 15 vite shërbim ushtarak.
Ngjarja tragjike ndodhi gjatë një ceremonie kushtuar forcave të armatosura dhe veteranëve. Patterson po merrte pjesë në një demonstrim, ku ushtarakët zbrisnin me litar nga pjesa e sipërme e stadiumit drejt fushës, kur ra nga një lartësi prej rreth 52 metrash. Ekipet mjekësore i dhanë ndihmën e parë në stadium dhe më pas e transportuan me urgjencë në spital, ku ai ndërroi jetë për shkak të plagëve të rënda.
Aksidenti ndodhi përpara syve të mijëra spektatorëve, ndërsa ndeshja mes UTSA-së dhe Akademisë Detare u shty për rreth 10 minuta për shkak të incidentit. Takimi vijoi më pas, një vendim që shkaktoi reagime dhe kritika nga një pjesë e publikut. Forcat Ajrore amerikane kanë shprehur ngushëllimet për familjen, miqtë dhe kolegët e ushtarakut, duke vlerësuar kontributin e tij gjatë shërbimit. Patterson ishte instruktor në fushën e kontrollit taktik ajror dhe në vitin 2022 ishte vlerësuar si instruktori më i mirë i specializuar në luftën speciale në nivel të Forcave Ajrore.
