Një satelit ushtarak rus, i njohur si Kosmos 2612, iu afrua një sateliti tjetër, të regjistruar në SHBA por që operohet nga një kompani finlandeze dhe ofron informacione inteligjence ukrainës, në një largësi prej më pak se 200 metrash. Kjo ndodhi pak pas mesnatës së 18 tetorit, 1 mijë kilometra mbi sipërfaqen e tokës. Incidenti ka tërhequr vëmendjen e vëzhguesve dhe kompanive komerciale, por edhe të agjencive perëndimore të inteligjencës. Dhe ky është rasti më i fundit në një seri veprimesh gjithnjë e më përshkallëzuese që përfshijnë jo vetëm Rusinë, por edhe SHBA-në, Kinën dhe vende të tjera që operojnë në hapësirë dhe kanë kapacitete satelitore, duke nxitur frikën për një garë armatimi ose për një luftë në hapësirë. Por, ekspertët thonë se ajo që nuk ishte parë më herët është afrimi kaq i madh i dy satelitëve, pa koordinim paraprak. Zyrtarët e sigurisë mendojnë se veprimi ishte shqetësues dhe agresiv, e madhe me qëllime potencialisht armiqësore. Afrimi në një distancë të tillë, 150 deri në 200 metra është jashtëzakonisht i afërt dhe nuk mund të jetë një veprim rutinë operacional. Në garën hapësinore gjatë Luftës së Ftohtë, Moska dhe Uashingtoni vendosën armë në orbitë, duke testuar dhe shpërthyer pajisje bërthamore, disa prej të cilave shkaktuan dëme të mëdha në komunikimet satelitore. Shpërthimet reciproke i hapën rrugën Traktatit për Hapësirën Kozmike të vitit 1967, i cili ndaloi përgjithmonë vendosjen e armëve bërthamore në hapësirë. Traktati nuk e përjashtoi sidoqoftë luftën kundër satelitëve, pra zhvillimin dhe vendosjen e teknologjive për të ndërprerë funksionimin ose për të shkatërruar pajisjet orbitale të vendeve të tjera. E tani, SHBA, Kina, Rusia, por edhe India, kanë gjurmët e tyre në hapësirë. Në dhjetor 2020, rusia testoi një raketë që shkatërroi një satelit ushtarak që ishte jashtë funksionit. Testi krijoi një re mbetjesh që më vonë rrezikoi Stacionin Ndërkombëtar Hapësinor. Muajin e kaluar ndërkohë, SHBA shkaktoi habi duke thënë se kishte vendosur armë në hapësirë duke treguar se gara ka qenë në zhvillim e sipër prej vitesh. Ajo që nuk është parë ende, është tani vetëm lufta mijëra km mbi tokë.