Franca paralajmëron zgjerimin e shtetrrethimit pas trazirave, mbi 3 mijë biznese të prekura

Franca mund të vendosë shtetrrethime të reja të pjesshme në zonat ku situata e sigurisë e kërkon, pas një fundjave protestash të dhunshme që kanë shkaktuar dëme në mijëra biznese dhe kanë shtuar presionin ndaj qeverisë së kryeministrit Sébastien Lecornu.

Sipas Euronews, kryeministri francez deklaroi të martën, më 20 tetor, se kufizimet e vendosura një natë më parë në disa qytete kishin ndihmuar në ruajtjen e qetësisë, ndërsa autoritetet lokale do të vendosin për masa të tjera në koordinim me kryebashkiakët.

Shtetrrethime të pjesshme hynë në fuqi të hënën në disa qytete, përfshirë Parisin, Bordo dhe Nicën. Në kryeqytetin francez, kufizimet e lëvizjes u zbatuan nga ora 23:00 deri në 06:00 në zonën e Place de la République dhe në lagjen tregtare Les Halles, ndërsa demonstratat u ndaluan pas orës 20:00.

Në disa qytete kufizimet janë parashikuar të zgjasin disa ditë, ndërsa në zona të tjera janë vendosur masa të përkohshme, në varësi të zhvillimeve të sigurisë.

Trazirat pasuan disa javë protestash të studentëve për kushtet në shkolla, ndërsa pakënaqësitë lidhur me rritjen e kostos së jetesës dhe cilësinë e shërbimeve publike kanë qenë gjithashtu pjesë e mobilizimeve.

Përplasjet gjatë fundjavës u shoqëruan me plaçkitje, dëmtime të objekteve tregtare dhe ndërhyrje të forcave të rendit në disa prej qyteteve kryesore të vendit. Më shumë se 2,400 persona janë arrestuar në lidhje me trazirat.

Sipas vlerësimeve paraprake të raportuara nga Euronews, të paktën 3 mijë biznese janë prekur nga dhuna dhe dëmtimet e pronës.

Ndikimi në aktivitetin ekonomik ka nxitur reagimin e organizatave të biznesit. Presidenti i organizatës kryesore të punëdhënësve francezë, Medef, Patrick Martin, kritikoi autoritetet për dështimin në garantimin e sigurisë gjatë trazirave.

Ministri francez i Financave, Roland Lescure, ka premtuar masa mbështetëse për tregtarët dhe zejtarët e prekur nga dhuna dhe dëmtimet e pronës.

Ndërkohë, qeveria ka planifikuar takime të tjera emergjente gjatë së martës, përfshirë diskutime me përfaqësues të platformave kryesore të rrjeteve sociale.

Masat e sigurisë vijnë në një periudhë tensionesh politike në Francë, rreth gjashtë muaj përpara zgjedhjeve presidenciale, ndërsa autoritetet po përgatiten për mundësinë e demonstratave të tjera.