Këngëtarja e njohur Mariah Carey ka fituar një betejë ligjore ndaj vëllait të saj, Morgan Carey, pasi një gjykatë në Nju Jork rrëzoi padinë për shpifje me vlerë 20 milionë dollarë, të ngritur për shkak të pretendimeve të përfshira në librin autobiografik të artistes.
Vendimi u dha të hënën nga gjyqtarja Leslie A. Stroth e Gjykatës Supreme të Shtetit të Nju Jorkut, e cila vlerësoi se Morgan Carey nuk kishte paraqitur prova të mjaftueshme për të dëshmuar se këngëtarja kishte bërë deklarata duke e ditur se ishin të pavërteta ose duke shpërfillur me vetëdije të vërtetën.
Padia ishte ngritur më 28 maj 2021, pas publikimit të librit autobiografik “The Meaning of Mariah Carey”, në vitin 2020. Morgan pretendonte se përshkrimet e bëra në libër kishin dëmtuar reputacionin e tij, duke e portretizuar si person të dhunshëm dhe duke e akuzuar për trafikim kokaine.
Në vendimin e saj, gjyqtarja theksoi se pretendimi për armiqësi apo keqdashje ndaj një familjari nuk mjafton për të përmbushur kriteret ligjore të një padie për shpifje.
Avokati i Mariah Carey, John Rosenberg, deklaroi për revistën Rolling Stone se këngëtarja është e kënaqur që gjykata njohu rëndësinë e çështjeve me interes publik të trajtuara në librin e saj dhe rrëzoi të gjitha pretendimet për shpifje.