Belinda Balluku merret e pandehur për korrupsion, pastrim parash, shkelje të barazisë në tendera në 9 raste dhe fshehje pasurie! SPAK i komunikon akuzat

Ish-zv.kryeministrja Belinda Balluku është paraqitur ditën e sotme në Prokurorinë e Posaçme, ku i janë komunikuar zyrtarisht akuzat. SPAK ka njoftuar se Balluku është marrë e pandehur për 'korrupsion' në 2 raste, 'pastrim parash' në 2 raste, 'shkeje të barazisë në tendera' në 9 raste dhe 'fshehje pasurie' në 2 raste. Pra mbi Ballukun rëndojnë 5 akuza (pasi 2 rastet e korrupsionit klasifikohen në akuza të ndryshme) për 15 raste shkeljesh.

"Prokuroria e Posaçme kundër Korrupsionit dhe Krimit të Organizuar i ka komunikuar sot, më 20.10.2026, të pandehurës Belinda Balluku akuzat përfundimtare për veprat penale të mëposhtme:

•          “Shkelje e barazisë së pjesëmarrësve në tendera apo ankande publike”, në bashkëpunim (nëntë herë), parashikuar nga neni 258/2 e 25 i Kodit Penal.

LEXO EDHE:
SPAK mori të pandehur Ballukun për 5 akuza, Bardhi: Rama propozon që të korruptuarit t’i mbajmë në Kuvend, ndërsa fëmijët t’i burgosim

•          “Korrupsion pasiv i personave që ushtrojnë funksione publike”, e parashikuar nga neni 259 i Kodit Penal.

•          “Korrupsion pasiv i funksionarëve të lartë shtetërorë ose i të zgjedhurve vendorë”, i parashikuar nga neni 260 i Kodit Penal.

•          “Refuzim për deklarimin, mosdeklarimin, fshehjen ose deklarimin e rremë të pasurive, interesave  privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, (dy herë), parashikuar nga neni 257/a, paragrafi i 2-të i Kodit Penal.

•          “Pastrim i produkteve të veprës penale ose i veprimtarisë kriminale”, parashikuar neni 287, gërma “b” i Kodit Penal, e kryer në rrethana cilësuese “në bashkëpunim dhe më shumë se një herë”, sipas nenit 287/2 të Kodit Penal (për dy pasuri të paluajtshme).

Prokuroria e Posaçme po vijon veprime konkrete procedurale për t’i komunikuar akuzat edhe personave të përfshirë në të njëjtën çështje penale.  Detaje të tjera do të bëhen të ditura në një moment të mëvonshëm", thuhet në njoftimin e SPAK.

Balluku u paraqit në SPAK bashkë me avokatin e saj, Ardian Kalia dhe qëndruan atje përreth 30 minuta. Në momentin që ata kanë shkuar në Prokurorinë e Posaçme, në ambientet e jashtme është vënë re një prani e madhe e forcave të Policisë.

‘Jemi në fazë hetimesh, do të ketë dhe një zgjatje’, mësohet të ketë thënë avokati i Ballukut gjatë paraqitjes në SPAK, duke nënkuptuar se Prokuroria e Posaçme ka zgjatur hetimet ndaj Ballukut.

Po ashtu në SPAK ditën e sotme është paraqitur edhe biznesmeni Pandeli Carapuli, bashkë me avokatin e tij, të cilit i është komunikuar akuza për ‘pastrim parash’.

Carapuli dyshohet se i dha ish-zv. kryeministres ryshfet një vilë luksoze në fshatin Gjilekë, Dhërmi, pasi Belinda Balluku e favorizoi në tenderin 1 milionë eurosh kur ishte drejtoreshë e Albcontrol. Për fshehjen e vilës Balluku përdori ish-futbollistin Igli Tare, i cili po ashtu është marrë person në hetim.

Më herët Balluku ishte marrë e pandehur nga SPAK për shkelje të barazisë në tendera te Unaza e Madhe dhe Tuneli i Llogarasë. Po ashtu ajo ka qenë nën hetim për korrupsion, pastrim parash dhe fshehje të pasurisë, vepra për të cilat u mor sot zyrtarisht e pandehur.

SPAK i sekuestroi Ballukut 2 vila, një në Dhërmi dhe një në Palasë, të cilat dyshohet se ishin fshehur nën emrin e ish-futbollistit të Kombëtares, Igli Tare. Vilën në Palasë, e cila ishte një vilë super-luksoze, sipas hetimeve të SPAK, Balluku e kishte marrë në formë ryshfeti për dhënien e tenderave, në kohën kur drejtonte Autoritetin Civil.

Lajm në përditësim...

-------------------------------

Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.

R.Xh/Shqiptarja.com

TAG:
• SPAK heton Ballukun
• Ardian Kalia
• belinda balluku
• spak