Formula 1 mund ta shpallë që këtë të diel në Austin kampionin e botës për pilotë të vitit 2026, me Andrea Kimi Antonellin shumë pranë një suksesi historik.

Atij do t’i mjaftonte të fitonte Çmimin e Madh të Teksasit dhe të shpresonte që George Russell, shoku i tij i skuadrës dhe ndjekësi më i afërt, të mos përfundonte më mirë se në vendin e nëntë, ndërsa piloti i Ferrarit, Lewis Hamilton, të mbetej jashtë katër vendeve të para. Megjithatë, realisht, kjo nuk është një kombinim rezultatesh aq i lehtë për t’u realizuar.

Ndoshta për këtë arsye, piloti bolognez i Mercedesit nuk po mendon për festën, por vetëm për garën.

“Nuk kam fituar ende asgjë. Edhe pse duket sikur më ka mbetur shumë pak, objektivi nuk është arritur ende. Jam në një pozicion të favorshëm për të fituar Botërorin dhe detyra ime është të nxjerr maksimumin nga makina dhe mundësitë që kam në dispozicion”, tha ai për revistën Autosprint.

Më pas, gjatë një takimi me yllin e San Antonio Spurs në NBA, Victor Wembanyama, ai pranoi:

“Po luftoj për titullin botëror, jam pranë fitimit të tij dhe shpresoj ta arrij brenda dy javëve të ardhshme, por të shohim se çfarë do të ndodhë.”

Deri tani, gjithsesi, sezoni ka qenë i jashtëzakonshëm: tetë fitore dhe gjithsej 14 podiume dëshmojnë për një dominim të papritur, por të padiskutueshëm.

“Fitorja e parë në Shangai më hoqi një peshë të madhe nga shpatullat. Cila ka qenë më e bukura? Podiumi në Monza, për mënyrën se si u zhvillua gara dhe për atmosferën që të dhuron. Nuk ka asgjë të krahasueshme me të në botë”, shtoi ai.