Prokuroria e Posaçme i ka komunikuar zyrtarisht Belinda Ballukut akuzat përfundimtare për pesë vepra penale, që lidhen me shkeljet në tenderat publikë, korrupsionin pasiv, deklarimin e pasurisë dhe pastrimin e parave. Ish-zëvendëskryeministrja është paraqitur këtë të martë në SPAK, ku është njohur me akuzat që rëndojnë ndaj saj.
Sipas njoftimit zyrtar, shkeljet e dyshuara në tendera përfshijnë nëntë raste, ndërsa hetimi për pastrimin e parave lidhet me dy pasuri të paluajtshme. SPAK bën me dije se po vijon veprimet procedurale për t’u komunikuar akuzat edhe personave të tjerë të përfshirë në të njëjtën çështje.
NJOFTIMI ZYRTAR
Prokuroria e Posaçme kundër Korrupsionit dhe Krimit të Organizuar i ka komunikuar sot, më 20.10.2026, të pandehurës Belinda Balluku akuzat përfundimtare për veprat penale të mëposhtme:
• “Shkelje e barazisë së pjesëmarrësve në tendera apo ankande publike”, në bashkëpunim (nëntë herë), parashikuar nga neni 258/2 e 25 i Kodit Penal.
• “Korrupsion pasiv i personave që ushtrojnë funksione publike”, e parashikuar nga neni 259 i Kodit Penal.
• “Korrupsion pasiv i funksionarëve të lartë shtetërorë ose i të zgjedhurve vendorë”, i parashikuar nga neni 260 i Kodit Penal.
• “Refuzim për deklarimin, mosdeklarimin, fshehjen ose deklarimin e rremë të pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, (dy herë), parashikuar nga neni 257/a, paragrafi i 2-të i Kodit Penal.
• “Pastrim i produkteve të veprës penale ose i veprimtarisë kriminale”, parashikuar neni 287, gërma “b” i Kodit Penal, e kryer në rrethana cilësuese “në bashkëpunim dhe më shumë se një herë”, sipas nenit 287/2 të Kodit Penal (për dy pasuri të paluajtshme).
Prokuroria e Posaçme po vijon veprime konkrete procedurale për t’i komunikuar akuzat edhe personave të përfshirë në të njëjtën çështje penale. Detaje të tjera do të bëhen të ditura në një moment të mëvonshëm.
