Florentino Perez nuk ka ndërmend ta mbyllë pa pasoja kapitullin e Superligës Europiane. Real Madridi synon t’u kërkojë klubeve angleze që iu bashkuan fillimisht projektit të kontribuojnë financiarisht për kostot e krijimit të tij, ndërsa nuk përjashtohet as një betejë ligjore për të siguruar shumën e kërkuar.
Sipas raportimeve të The Athletic, drejtuesit e klubit madrilen besojnë se klubet që u tërhoqën papritur nga projekti duhet të mbajnë përgjegjësi për shpenzimet e realizimit të tij. Kostoja totale mund të arrijë deri në 80 milionë euro, një shumë që deri më tani është mbuluar nga Real Madridi, Barcelona dhe Juventusi, ky i fundit i tërhequr zyrtarisht në vitin 2023.
Në shënjestër të kërkesës së madrilenëve janë klubet angleze që mbështetën fillimisht krijimin e kompeticionit, konkretisht Manchester United, Manchester City, Chelsea, Tottenham dhe Arsenal. Megjithatë, mbetet për t’u parë nëse Real Madridi ka bazën e nevojshme kontraktuale për t’i detyruar këto klube të paguajnë pjesën e tyre të shpenzimeve.
Sipas burimeve të cituara, presidenti Florentino Perez është i gatshëm të ndjekë rrugën ligjore për të rikuperuar shumën që pretendon se i takon klubit spanjoll.
Superliga Europiane u prezantua më 19 prill 2021, me synimin për të krijuar një kompeticion të ri që do të përfshinte disa prej klubeve më të mëdha të kontinentit. Megjithatë, projekti hasi në kundërshtime të forta dhe, vetëm pak ditë pas shpalljes, gjashtë klubet angleze, së bashku me Milanin, Interin dhe Atletico Madridin, njoftuan tërheqjen e tyre.
Real Madridi, Barcelona dhe Juventusi mbetën për një kohë të gjatë të lidhura me iniciativën, por edhe ky front u shpërbë gradualisht. Më 11 shkurt 2026, Real Madridi njoftoi përfundimisht fundin e projektit, duke mbyllur një kapitull të gjatë polemikash në futbollin europian.