Autoritetet italiane kanë intensifikuar hetimet pas dy ditëve të trazirave në Milano, ku një protestë që nisi në mënyrë paqësore përfundoi me përplasje me policinë, dëmtime të pronës dhe grabitje dyqanesh. Deri tani janë konfirmuar 45 arrestime, ndërsa 271 persona janë identifikuar dhe shoqëruar për verifikime.
Sipas televizionit italian TGCOM24, të dyshuarit po hetohen për grabitje, dëmtim të pronës dhe rezistencë të rënduar ndaj punonjësve të policisë. Seancat e para të marrjes në pyetje janë zhvilluar gjatë ditës së sotme, me 11 të rritur të dëgjuar në burgun San Vittore dhe 34 të mitur në institucionin për të mitur Cesare Beccaria.
Për katër prej të rriturve është konfirmuar masa e arrestit, ndërsa ndaj një 24-vjeçari është vendosur arresti shtëpiak me byzylyk elektronik. Edhe për shumicën e të miturve është caktuar masa e arrestit shtëpiak, ndërsa në dy raste është konfirmuar arrestimi.
Mes personave të përfshirë në hetime ka shtetas italianë dhe të huaj. Autoritetet po vijojnë verifikimet për të përcaktuar rolin e secilit në episodet e dhunës dhe dëmet e shkaktuara gjatë trazirave.
TGCOM24 ka raportuar edhe rastin e një 14-vjeçari, për të cilin avokatja e caktuar nga shteti deklaroi se kishte dalë në qendër të qytetit me të ëmën, por kishte humbur kontaktet me të gjatë kaosit. Sipas mbrojtëses, i mituri kishte qëndruar duke parë skenat e dhunës dhe ishte i çorientuar.
Protesta kishte nisur kundër luftërave dhe rritjes së kostos së jetesës, por situata u përshkallëzua me hedhje gurësh dhe objektesh drejt policisë, zjarrvënie, shkatërrime dhe grabitje. Forcat e rendit ndërhynë me gaz lotsjellës dhe ujë me presion për të shpërndarë turmën.
Pas ngjarjeve, qeveria italiane ka paralajmëruar masa më të forta sigurie, ndërsa hetimet vijojnë për identifikimin e personave të tjerë që dyshohet se morën pjesë në trazira.