Zëvendëskryeministrja Albana Koçiu ka reaguar përmes një postimi në rrjetet sociale lidhur me protestat e dhunshme të ditëve të fundit, duke publikuar pamje edhe nga protestat e Partisë Demokratike në janar dhe shkurt të këtij viti, kur protestuesit hodhën molotovë drejt Kryeministrisë.
Koçiu i ka cilësuar këto zhvillime si pjesë të të njëjtit skenar, duke akuzuar organizatorët se, pavarësisht kauzave të ndryshme të paraqitura, synimi mbetet i njëjtë.
“I njëjti skenar. E njëjta dhunë. E njëjta dorë. Nën petkun e ‘kauzave’ që ndërrohen sipas hallit të ditës, qëllimi mbetet po ai i vjetri: pengmarrja e së ardhmes së Shqipërisë”, shkroi zëvendëskryeministrja.
Sipas Koçiut, qytetarët e kanë njohur këtë model protestash dhe e kanë refuzuar atë përmes votës. Ajo u shpreh se, sipas saj, shqiptarët nuk do të lejojnë rikthimin e së shkuarës përmes akteve të dhunshme.
“E refuzuan dje, e refuzojnë sot dhe do ta refuzojnë sërish sa herë që e shkuara të kërkojë të rikthehet me dhunë”, deklaroi ajo.
Në përfundim të reagimit, Koçiu theksoi: “Shqipëria nuk kthehet më pas”.