Policia përdori gaz lotsjellës dhe autobotë me ujë për të zmbrapsur protestuesit të martën, në ditën e tetë radhazi të demonstratave të dhunshme kundër qeverisë në kryeqytetin shqiptar, Tiranë.

Nxënësit e shkollave të mesme dhe studentët e universiteteve, të cilët kërkojnë uljen e tarifave të shkollimit, rritjen e investimeve shtetërore në arsim dhe protestojnë kundër korrupsionit në sistemin arsimor, i janë bashkuar një lëvizjeje më të gjerë kundër qeverisë, që kërkon dorëheqjen e kryeministrit socialist Edi Rama.

Prej disa ditësh, protestuesit kanë hedhur gurë, flakadanë, bomba molotov dhe fishekzjarrë drejt policisë, e cila u është përgjigjur me shkopinj gome, autobotë me ujë dhe gaz lotsjellës gjatë përplasjeve në qendër të qytetit.

Shqipëria është një nga disa vendet europiane ku po zhvillohen protesta për shkak të rritjes së kostove të karburanteve, pakënaqësisë për gjendjen e shkollave, përkeqësimit të shërbimeve publike dhe krizës së strehimit. Mes tyre janë Franca dhe Italia. Në Spanjë dhe Portugali janë ngritur kampe me tenda për të protestuar kundër çmimeve të papërballueshme të banesave, ndërsa në Greqi ishin planifikuar një tubim dhe një protestë për mbrëmjen e së martës dhe të mërkurën.

Në Shqipëri, protestat e fundit vijnë pas disa muajsh tubimesh të organizuara nga e ashtuquajtura lëvizja Flamingo, e cila u krijua për të kundërshtuar një projekt të madh turistik luksoz në bregdetin jugor të vendit. 

“Një valë gurësh, një përpjekje për të rrëzuar qeverinë dhe për të ndryshuar ata që janë në pushtet përmes imponimit të dhunës, diçka që nuk do të lejohet kurrë të ndodhë, në asnjë rrethanë dhe për asnjë arsye”, tha Rama pas një takimi të martën me mësues dhe përfaqësues të shkollave të Tiranës.

Ai argumentoi se shqetësimet e ligjshme të qytetarëve po shfrytëzohen nga persona që nxisin qëllimisht dhunën gjatë protestave.

“Kjo është një luftë hibride, e cila natyrisht funksionon deri në atë masë saqë mbështetet te shqetësime reale dhe jo te fantazi. Shqetësimet për koston e jetesës janë sigurisht reale. Po kështu janë reale edhe shqetësimet për një të ardhme të sigurt, strehimin dhe mundësitë më të mëdha për të ecur përpara”, tha Rama.

Kryeministri i akuzoi protestuesit se po e “mbajnë qytetin nën një klimë terrori” dhe deklaroi se studentët e përfshirë në protesta “i përkasin rrymave të reja të ekstremizmit politik”. / LA Times – Syri.net