U shemb në skenë gjatë finales, ndërron jetë në moshë të re bodybuilderi

Një ngjarje tragjike ka tronditur botën e bodybuildingut.

Mateusz Chmura, 33 vjeç, me origjinë polake dhe banues në Wakefield të Anglisë, ka humbur jetën pasi u rrëzua papritur gjatë finales britanike të bodybuildingut, të zhvilluar të dielën, më 18 tetor, në Telford International Centre.

Chmura po merrte pjesë në “PCA British Finals”, një nga garat e rëndësishme të bodybuildingut amator, ku atletët prezantojnë rezultatet e muajve të tërë stërvitjeje dhe përkushtimi.

Në një moment që duhej të ishte kulmi i përgatitjeve të tij, 33-vjeçari pësoi një gjendje të papritur shëndetësore dhe u shemb në skenë, përpara gjyqtarëve dhe konkurrentëve të tjerë.

Ai u transportua me urgjencë në spital, por, pavarësisht përpjekjeve për ta shpëtuar, ndërroi jetë disa orë më vonë.

Shkaku i saktë i vdekjes nuk është bërë ende publik. Deri më tani, nuk ka të dhëna të konfirmuara që të shpjegojnë se çfarë e shkaktoi gjendjen e rëndë shëndetësore të sportistit.

Lajmi ka shkaktuar trishtim, pasi skena ku Chmura u rrëzua përfaqësonte për të përfundimin e një rrugëtimi të gjatë, të mbushur me stërvitje, sakrifica dhe përkushtim ndaj sportit.

Vdekja e tij është një humbje e rëndë për familjarët, miqtë dhe komunitetin e bodybuildingut.